၉.၆.၂၀၂၄
Written by TZ
ရန်ကုန်တိုင်းဒေသကြီး၊ တာမွေမြို့နယ်၊ မေတ္တာညွန့်ရပ်ကွက်၊ စက်မှု (၃) လမ်း၊ သံလမ်းအနီး ရပ်ထားသည့် Toyota Fielder အမျိုးအစား Taxi ကားတစ်စီးပေါ် ဓားဒဏ်ရာများဖြင့် သေဆုံးနေသည့် အမျိုးသားတစ်ဦး၏ ရုပ်အလောင်းကို တွေ့ရှိခဲ့ကြောင်း သိရသည်။
ဇွန်လ ၈ ရက် နံနက် ၁၀ နာရီဝန်းကျင်တွင် ထိုယာဥ်၏ ခေါင်းခြမ်း၌လိုက်ပါလာသည့် အမျိုးသားတစ်ဦးမှာ ထိုးသွင်းဒဏ်ရာနှင့် သေဆုံးနေသည်ကို တာဝန်ရှိရဲများမှ မြန်မာမွတ်စလင်မ်ပရဟိတအဖွဲ့ထံသို့ ဖုန်းဆက်အကြောင်းကြားသောကြောင့် သွားရောက်သယ်ဆောင်ခဲ့ကြောင်း သိရသည်။
“ယာဥ်မောင်းရဲ့ ဘယ်ဘက်ထိုင်ခုံမှာ ဓားဒဏ်ရာနဲ့သေနေတာ။ ဘယ်ဘက်ရင်ဘက်မှာ ဓားဒဏ်ရာတစ်ချက်နဲ့သေနေတာ။ တခြားအကြောင်းအရာတွေတော့မသိဘူး” ဟု မြန်မာမွတ်စလင်မ်ပရဟိတအဖွဲ့မှ တာဝန်ရှိသူတစ်ဦးက MT News သို့ ဖြေကြားသည်။
ဓားဒဏ်ရာများဖြင့်သတ်ဖြတ်ခံရသည့် အမျိုးသားမှာ အသက် (၃၀) ဝန်းကျင်ရှိပြီး၊ ရုပ်အလောင်းကို သင်္ဃန်းကျွန်းမြို့နယ် စံပြဆေးရုံရေခဲတိုက်ကို ပို့လိုက်ကြောင်း သိရသည်။
ဓာတ်ပုံ -မြန်မာမွတ်စလင်မ်ပရဟိတအဖွဲ့
