၅.၆.၂၀၂၄
Written by KL
ရှမ်းပြည်နယ်(မြောက်ပိုင်း)၊ လားရှိုးမြို့နယ်၊ ရှန်ခိုက်ကျေးရွာအုပ်စု၊ ရှန်ခိုက်ရွာအနောက်ရှိ ရှန်ခိုက်ရေချောင်းထဲတွင် ဇွန်လ ၄ ရက် နံနက် ၁၁ နာရီခန့်က ပုပ်ပွသေဆုံးနေသော ဘုန်းကြီးတစ်ပါး၏ ရုပ်အလောင်းကို တွေ့ရှိခဲ့ကြောင်း ဆယ်ယူပေးခဲ့သူများထံမှ သိရသည်။
သေဆုံးသူမှာ အသက် ၅၀ အရွယ်ခန့်ရှိပြီး ရပ်ကွက်(၄)တွင် သီတင်းသုံးနေထိုင်သူဖြစ်ကာ ဘုန်းကြီးဝတ်သည်မှာ တစ်လကျော်ရှိပြီဖြစ်ကြောင်း လားရှိုးလူငယ်များလူမှုကူညီရေးအဖွဲ့ထံမှ သိရသည်။
“အလောင်းက လေးငါးရက်လောက်ရှိပြီ။ အလောင်းပေါ်လို့ သွားကူပေးရင်းနဲ့ အလောင်းတွေ့မှ ဘုန်းဘုန်းလို့ သိရတာပါ။အတော်နံပြီး ပုပ်ပွနေပြီ။ သေတာက လေးငါးရက်လောက်ရှိပြီ”ဟု လားရှိုးလူငယ်များ လူမှုကူညီရေးအဖွဲ့မှ အဖွဲ့ဝင်တစ်ဦးက ပြောသည်။
ရေချောင်းအတွင်း ပုပ်ပွသေဆုံးနေသည့်ရုပ်အလောင်းကို အဖွဲ့ဝင် ၅ ဦးဖြင့် သွားရောက်ဆယ်ယူပေးခဲ့ပြီး လားရှိုးပြည်သူ့ဆေးရုံကြီး ရင်ခွဲရုံသို့ ပို့အပ်ကာ PR-009 ဖြင့် လက်ခံထားကြောင်း သိရသည်။
