၁.၆.၂၀၂၄
Written by KL
ရန်ကုန်တိုင်းဒေသကြီး၊ မှော်ဘီမြို့နယ်၊ တပ်ကြီးကုန်းကျေးရွာ၊ ပြည်လမ်းမပေါ်တွင် ယနေ့(ဇွန်လ ၁ရက်)နံနက် ၄ နာရီခန့်က ရပ်ထားသော ၁၂ ဘီးကားကို Hijet ယာဥ်တစ်စီးက ဝင်တိုက်ခဲ့ရာ ကားခေါင်းအတွင်း ညပ်နေသော ယာဥ်မောင်းကို အသက်ရှင်လျက် ကယ်ဆယ်နိုင်ခဲ့ကြောင်း ကယ်ဆယ်ရေးဆောင်ရွက်သူများထံမှ သိရသည်။
ဖြစ်စဥ်မှာ မှော်ဘီဘက်မှ တိုက်ကြီးမြို့ဘက်သို့ မောင်းနှင်လာသော ယာဥ်မောင်း ကိုဝေယံဖြိုး မောင်းနှင်လာသည့် Hijet အဖြူရောင်ယာဥ်က ရပ်ထားသည့် Nissan အဖြူရောင် ၁၂ ဘီးယာဥ်ကို ဝင်တိုက်ခဲ့သဖြင့် ယာဥ်မောင်း ကိုဝေယံဖြိုးမှာ ကားခေါင်းအတွင်းညပ်နေသဖြင့် မှော်ဘီမြို့နယ်မီးသတ်စခန်းမှ မီးငြှိမ်းသတ်ယာဉ်(၁)စီး၊ သန္ဓေအရံမီးသတ်တပ်ဖွဲ့ဝင် ၁၄ ဦးတို့ ကယ်ဆယ်ရေးဆောင်ရွက်ခဲ့ရာ ၁၅ မိနစ်အကြာတွင် ကယ်ထုတ်နိုင်ခဲ့ကြောင်း သိရသည်။
“ကားသမားကတော့ နဖူးမှာပွန်းပဲ့ဒဏ်ရာရယ်။ ဘယ်ဘက်မျက်ခုံးပွန်းပဲ့ ဒဏ်ရာပဲရတယ်။ အသက်အန္တရာယ်မစိုးရိမ်ရပါဘူး”ဟု ကယ်ဆယ်ရေးဆောင်ရွက်ခဲ့သည့် မီးသတ်တပ်ဖွဲ့ဝင် တစ်ဦးက ပြောသည်။
ဒဏ်ရာရရှိသူကို မြို့မလူမှုကူညီရေးအသင်းမှ လူနာတင်ယာဥ်ဖြင့် မှော်ဘီမြို့နယ် ပြည်သူ့ဆေးရုံကြီးသို့ ပို့ဆောင်ပေးခဲ့ကြောင်း သိရသည်။
