၂၉.၅.၂၀၂၄
Written by KL
မကွေး-ရန်ကုန် ပြေးဆွဲသည့် ခရီးသည်တင်ယာဥ်နှင့် လူနှစ်ဦး စီးလာသော ဆိုင်ကယ်ဝင်တိုက်ရာမှ အမျိုးသားကြီး တစ်ဦးသေဆုံးမှု ပဲခူးတိုင်းဒေသကြီး ပြည်မြို့၊ ပြည် – အောင်လံ ကားလမ်းမပေါ် ၊ တီတွတ် ဂေါက်ကွင်းအနီးတွင် မေလ ၂၉ ရက် မွန်းလွဲ ၁ နာရီခန့်က ဖြစ်ပွားခဲ့သည်။
ယာဥ်တိုက်မှုကြောင့် ခရီးသည်တင်ယာဥ်အောက်တွင် ညပ်နေသော ဆိုင်ကယ်မောင်းသူ အသက် ၅၀ ကျော်အရွယ် အမျိုးသားကြီးမှာ ဦးခေါင်း ထိိခိုက်ဒဏ်ရာ၊ နားသွေးထွက်ဒဏ်ရာ၊ ခြေထောက်တစ်ဖက်နှင့် လက်တစ်ဖက်ကျိုးဒဏ်ရာ၊တင်ပါးတို့တွင်လည်း ထိခိုက်ဒဏ်ရာများရရှိကာ နေရာတွင် သေဆုံးခဲ့ပြီး ဆိုင်ကယ်အနောက်၌ လိုက်ပါလာသော အသက် ၃၀ ခန့်အရွယ် အမျိုးသမီးတွင် ခြေသလုံး အရေပြားလန် ဒဏ်ရာများ ရရှိခဲ့ကြောင်း ကယ်ဆယ်ရေးဆောင်ရွက်ခဲ့သည့် မြန်မာနိုင်ငံ လူမှုကယ်ဆယ်ရေးအဖွဲ့ ( ပြည် ) ပရဟိတပါရမီထံမှ အဖွဲ့ဝင် တစ်ဦးက ပြောသည်။
“ဆိုင်ကယ်က ပြည်ကိုအထွက် ကားက ကောင်းမြတ်သာ ကားလို့ သိရတယ်။ ပြည်အဝင်မှာ ဖြစ်သွားတာ၊။ သေဆုံးသွားတဲ့သူက ရဲတပ်ရင်း (၁၀)က တပ်ကြပ်ကြီးလို့ သိရတယ်။ သူ့သမီးလည်း ခြေထောက်တွေထိသွားတယ်”ဟု ဒေသခံတစ်ဦးက ပြောသည်။
အဆိုပါ ယာဥ်မတော်တဆမှုကို မြန်မာနိုင်ငံ လူမှုကယ်ဆယ်ရေးအဖွဲ့ ( ပြည် ) ပရဟိတပါရမီမှ အဖွဲ့ဝင် ၆ ဦးက သွားရောက်ကူညီပေးခဲ့ပြီး သေဆုံးသူနှင့် ဒဏ်ရာရရှိသူ အမျိုးသမီးတို့ကို ပြည်ကုတင် (၅၀၀)ဆံ့ ပြည်သူ့ဆေးရုံသို့ ပို့ဆောင်ပေးခဲ့ကြောင်း သိရသည်။
