၂၆.၅.၂၀၂၄
Written By Zun
ရှမ်းပြည်နယ်မြောက်ပိုင်း၊ ကျောက်မဲမြို့ရှိ One Love Hotel တွင် ယနေ့ည ၈ နာရီခွဲခန့်အချိန်က ပေါက်ကွဲမှုဖြစ်ပွားခဲ့ပြီး အမျိုးသားတစ်ဦး ထိခိုက်ဒဏ်ရာရရှိခဲ့ကာ ကားနှစ်စီးထိခိုက်ခဲ့ကြောင်း ကျောက်မဲဒေသခံတစ်ဦးက MT News ကို အတည်ပြု ပြောပြသည်။
“ပေါက်ကွဲသံက အကျယ်ကြီးပဲ။ ကျွန်တော်တို့ ကြားရတယ်။ စုံစမ်းကြည့်လိုက်တော့ One Love Hotel နားမှာ ပေါက်ကွဲတာ။ လူတစ်ယောက်၊ ကားနှစ်စီးထိတယ်လို့ လောလောဆယ် သိရတယ်။ ဘယ်သူတွေကလုပ်လဲ မသိသေးဘူး”ဟု ကျောက်မဲ မြို့ခံတစ်ဦးက MT News ကို ပြောသည်။
အဆိုပါ One Love Hotel မှာ ကျောက်မဲမြို့ မိုးကုတ်- ကျောက်မဲလမ်းပေါ်တွင်ရှိပြီး ဟိုတယ်၏ ရှေ့မျက်နှာစာ၌ ပေါက်ကွဲခြင်းဖြစ်ကြောင်း၊ ပေါက်ကွဲသည့်အရာမှာ ဗုံးဖြစ်ပြီး မည်သည့်ဗုံးအမျိုးအစားဖြစ်သည်ကိုလည်း မသိရသေးကြောင်း ၎င်းက ပြောသည်။
“အခုက ဒဏ်ရာရတဲ့သူကို ဆေးရုံကို ပို့လိုက်တယ်လို့ ပြောတယ်။ ကျွန်တော်တို့ ဒေသမှာက ဒေသတွင်း ပရဟိတတွေ ရှိတယ်။ ဒါပေမဲ့ ဒီအချိန်မှာက ဘယ်အဖွဲ့က ဆေးရုံကို ပို့သလဲ ဆိုတာ ကျွန်တော်လည်း မပြောနိုင်ပါဘူးဗျ”ဟု ယင်း ဒေသခံက ပြောသည်။
