“ချစ်သောနှင်းဆီ” ဇာတ်လမ်းတွဲမှာ အဖြည်မပါတဲ့ ဗန့်ကာရိုက်တာနဲ့ ပါဝင်သရုပ်ဆောင်ထားတယ်ဆိုတဲ့ အေးချမ်းမောင်

၂၅.၅.၂၀၂၄
Written By Thandar

ပရိသတ်ချစ်ခင်မှုရရှိထားတဲ့ မင်းသားအေးချမ်းမောင်ကတော့ Mahar Original Series က ရိုက်ကူးထားတဲ့ အချစ်ဒရာမာ ဇာတ်လမ်းပုံစံ “ချစ်သောနှင်းဆီ” ဇာတ်လမ်းတွဲမှာ မင်းလူဆိုတဲ့ အဖြည်မပါတဲ့ဗန့်ကာရိုက်တာနေရာက ပါဝင်သရုပ်ဆောင်ထားတယ်လို့ ဆိုပါတယ်။

“ဒီ ချစ်သောနှင်းဆီက ရုပ်ရှင်ကားကြီးရိုက်ဖို့ပြင်ထားခဲ့တာပါ။ ရိုက်မယ်လုပ်လိုက် ပျက်သွားလိုက်နဲ့မို့ ၂၀၂၃ ခုနှစ်ကမှ မင်းသားအေးချမ်းမောင်နဲ့ ဇာတ်လမ်းတွဲအနေနဲ့ ဖန်တီးဖြစ်ခဲ့တာပါ။ ဗန့်ကာရိုက်တာ ဇာတ်ကောင်ကိုလည်း အေးချမ်းမောင်က လုပ်ရတယ်ဆိုတော့ ရိုက်ဖြစ်သွားတာပါ။ ဒီဇာတ်က ဗန့်ကိုမှ လုံးဝအဖြည်မပါတဲ့ ဇာတ်လေ။ သူ့အတွက် ပရိသတ်ရဲ့အားပေးမှု အပြောင်းအလဲဖြစ်စေမယ့် ဇာတ်ပါ။ အေးချမ်းမောင်ကလည်း ကြိုက်တယ် ရိုက်မယ်ဆိုတော့ မင်းလူကာရိုက်တာကို သူနဲ့ရိုက်ဖြစ်ခဲ့တာပါ” လို့ ဒါရိုက်တာ အောင်ချမ်းလူက ပြောပါတယ်။

အဆိုပါ ဇာတ်လမ်းတွဲကို ဇာတ်ညွှန်း ညမွှေးပန်း၊ ငွေစင်သွန်းတို့က ရေးသားပြီးတော့ ဇာတ်လမ်းနဲ့ ဒါရိုက်တာ အောင်ချမ်းလူက သရုပ်ဆောင်တွေဖြစ်တဲ့ အေးချမ်းမောင်၊ အကယ်ဒမီ ခင်ဝင့်ဝါ၊ အကယ်ဒမီ မြတ်ကေသီအောင်၊ စင်ဒီမြတ်၊ ဝီလျှံမင်းမြတ်၊ မင်းအာကာ၊ သုန္ဒြေဦး၊ ဟန်နီဇော်၊ စင်သီယာ၊ ကောင်းညှို့လင်း၊ ပြည့်စုံသူ၊ မြတ်အမရာ စတဲ့သူတွေနဲ့ ရိုက်ကူးထားပါတယ်။

အကယ်ဒမီ ခင်ဝင့်ဝါက အဆိုပါဇာတ်လမ်းတွဲမှာ မြကြေးမုံဆိုတဲ့ ဇာတ်ရုပ်နေရာက သရုပ်ဆောင်ထားပြီး ဇာတ်ကားရဲ့ ဇာတ်ဝင်တေး My Dear Rose သီချင်းကိုတော့ တေးရေး ဇော်ခွန်က ရေးသားကာ ဇော်ခွန်နဲ့ မေရီဝင်းတို့က သီဆိုထားတာလည်းဖြစ်ပါတယ်။

အပိုင်း ၂၀ ပါဝင်မယ့် “ချစ်သောနှင်းဆီ” ဇာတ်လမ်းတွဲကိုတော့ မနက်ဖြန် မေလ ၂၆ ရက်နေ့ကစတင်ပြီး ည ၇ နာရီမှာ Mahar Application က ထုတ်လွှင့်ပြသမှာလည်း ဖြစ်ပါတယ်။