၂၁.၅.၂၀၂၄
Written By Thandar
ပေါ့ပေါ့ပါးပါးနဲ့ ရယ်မောရမယ့် အချစ်ဟာသဇာတ်မြူးပုံစံ “လူကြီးလူကောင်းများ” ရုပ်ရှင်ဇာတ်ကားကြီး Premier Show ပွဲကို ယနေ့ မေ လ ၂၁ ရက် ညနေပိုင်းက ရန်ကုန်မြို့ သမ္မတအဆင့်မြင့်ရုပ်ရှင်ရုံမှာ ကျင်းပခဲ့ပါတယ်။
“အများပိုင်ကုမ္ပဏီက ထုတ်လုပ် ရိုက်ကူးခဲ့တဲ့ ကားပါ။ ၂၀၁၈ အကျော်က အနုပညာရှင်တွေ အခကြေးငွေမယူဘဲနဲ့ ရိုက်ကူးပေးခဲ့တာလည်းဖြစ်ပါတယ်။ မင်းသားလေးလက်အတွဲအဖက်ကလည်း နည်းပါတယ်။ နောက် ဒီအနုပညာရှင် လွင်မိုး၊ လူမင်း၊ ပြေတီဦး၊ ခန့်စည်သူဆိုတဲ့ လေးယောက်က နောက်ပိုင်းတွဲဖက်ရိုက်ဖြစ်ပါ့မလား မသိပါဘူး။ ဒီဇာတ်ကားက ရရှိလာတဲ့ ဝင်ငွေတွေကို လိုအပ်နေတဲ့ ရုပ်ရှင်လောကသားတွေ ပံ့ပိုးကူညီသွားမှာပါ” လို့ သရုပ်ဆောင်အရိုင်းက ပြောပါတယ်။
ဒီဇာတ်ကားကို ဇာတ်ညွှန်း နေစိုးသော်က ရေးသားပြီး ဇာတ်လမ်းနဲ့ ရိုက်ကွင်းဇာတ်ညွှန်း ဒါရိုက်တာပြည်ဟိန်းသီဟက ၂၀၁၈ ခုနှစ်က ငွေဆောင်၊ ဘားအံ စတဲ့နေရာတွေမှာ အချစ်ဟာသပုံစံ ရိုက်ကူးပုံဖော်ထားတာလည်းဖြစ်ပါတယ်။
သရုပ်ဆောင်တွေအဖြစ် လွင်မိုး၊ လူမင်း၊ ပြေတီဦး၊ ခန့်စည်သူ၊ စိုးမြတ်သူဇာ၊ ရွှေအိမ်စည်၊ ထက်ထက်ထွန်း၊ စဝ်ယွန်းဝတီဦး၊ ယွန်းဝင့်လွှာအောင်၊ အရိုင်း၊ ငှက်ပျော်ကြော် စတဲ့အနုပညာရှင်တွေများစွာ ပါဝင်ထားကြပါတယ်။
“လူကြီးလူကောင်းများ” ရုပ်ရှင်ဇာတ်ကားကြီးကို လာမယ့် မေလ ၂၄ ရက်နေ့မှာ မြန်မာပြည်ရှိ အဆင့်မြင့်ရုပ်ရှင်ရုံတွေမှာ ရုံတင်ပြသမှာဖြစ်ပါတယ်။
