ယခုဘဏ္ဍာနှစ် တစ်လအတွင်း CMP ကုန်ကြမ်းတင်သွင်းမှု လျော့ကျနေသော်လည်း စက်မှုကုန်ချောတင်ပို့မှု ယခင်နှစ်ကာလတူထက် ပိုမိုတင်ပို့ထား

၇. ၅. ၂၀၂၄
Written by Ye Kyaw

ယခုဘဏ္ဍာနှစ် တစ်လအတွင်း ပြည်ပမှ CMP ကုန်ကြမ်းတင်သွင်းမှု လျော့ကျနေသော်လည်း CMP အပါအဝင် စက်မှုကုန်ချောတင်ပို့မှု ယခင်နှစ်ကာလတူထက် ပိုမိုတင်ပို့ထားနိုင်ခဲ့ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ သိရသည်။

ယခု ၂၀၂၄-၂၀၂၅ ဘဏ္ဍာနှစ် ဧပြီ ၁ ရက်မှ ၂၆ ရက်အထိ တစ်လအတွင်း ပြည်ပမှ CMP ကုန်ကြမ်းတင်သွင်းမှု ဒေါ်လာ ၁၇၅ သန်းနီးပါးသာ တင်သွင်းထားပြီး ယခင်နှစ်ကာလတူထက် ‌တင်သွင်းမှုပမာဏ ဒေါ်လာ ၃ သန်းနီးပါး လျော့ကျခဲ့သည်။

သို့သော် ပြည်ပမှကုန်ကြမ်းတင်သွင်းကာ ပြည်တွင်း၌ ကုန်ချောထုတ်ပြီး ပြည်ပသို့ပြန်လည်တင်ပို့သည့် စက်မှုကုန်ချော တင်ပို့မှုသည် အဆိုပါကာလအတွင်း ဒေါ်လာ ၄၅၇ ဒသမ ၁၁၈ သန်းရှိပြီး ယခင်နှစ်ကာလတူထက် တင်ပို့မှုပမာဏ ဒေါ်လာ ၄ ဒသမ ၄ သန်းခန့် ပိုမိုတင်ပို့ထားနိုင်ခဲ့ခြင်းဖြစ်သည်။

မြန်မာ့ကုန်ထုတ်လုပ်မှုသည် ခုနစ်လဆက်တိုက် ကျဆင်းခဲ့သော်လည်း ဝယ်လိုအားပြန်မြင့်တက်လာ၍ ပြီးခဲ့သည့် ဧပြီလအတွင်း ကုန်ထုတ်လုပ်မှုများ ပြန်လည်တိုးတက်ကာ ဦးမော့လာခဲ့ကြောင်း မေလ ၂ ရက်တွင် ထုတ်ပြန်သည့် S&P Global မြန်မာ့ထုတ်လုပ်မှု Purchasing Managers’ Index (PMI) စစ်တမ်းတွင် ဖော်ပြထားသည်။

ပြီးခဲ့သည့် ၂၀၂၃-၂၀၂၄ ဘဏ္ဍာနှစ်အတွင်း ခုနစ်လဆက်တိုက် ကုန်ထုတ်လုပ်မှုကျဆင်းခဲ့သောကြောင့် စက်မှုကုန်ချောပစ္စည်းတင်ပို့မှု ဒေါ်လာ ၈ ဒသမ ၈၇၅ ဘီလျံသာရှိပြီး ၂၀၂၂-၂၀၂၃ ဘဏ္ဍာနှစ်ထက် တင်ပို့မှုပမာဏ ဒေါ်လာ ၂ ဘီလျံကျော်အထိ လျော့ကျခဲ့ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ သိရသည်။

မြန်မာနိုင်ငံအနေဖြင့် ပြည်ပသို့ ပို့ကုန်တင်ပို့ရာတွင် လယ်ယာထွက်၊ တိရစ္ဆာန်ထွက်၊ ရေထွက်၊ သတ္တုတွင်းထွက်၊ သစ်တောထွက်နှင့် စက်မှုကုန်ချောပစ္စည်းတို့ကို အဓိကတင်ပို့နေခြင်းဖြစ်ပြီး အဆိုပါတစ်လအတွင်း စုစုပေါင်းပို့ကုန်ပမာဏ ဒေါ်လာ ၈၈၇ ဒသမ ၅၂၂ သန်းရှိခဲ့၍ ယခင်နှစ်ကာလတူထက် ဒေါ်လာသန်း ၁၄၀ ကျော် ပိုမိုတင်ပို့ထားနိုင်ခဲ့ခြင်းလည်းဖြစ်သည်။