ထိုင်းနိုင်ငံက မြန်မာနိုင်ငံကို လူသားချင်းစာနာထောက်ထားမှုဆိုင်ရာ အကူအညီတွေ တိုးချဲ့ပေးအပ်ဖို့ စဉ်းစားနေတယ်လို့ တာဝန်ရှိသူ ပြော

၁၉. ၄. ၂၀၂၄
Written by Pan Ei

ထိုင်းနိုင်ငံဟာ ပဋိပက္ခဖြစ်ပွားနေတဲ့ အိမ်နီးချင်း မြန်မာနိုင်ငံကို လူသားချင်းစာနာထောက်ထားမှုဆိုင်ရာ အကူအညီတွေ တိုးချဲ့ပေးအပ်ဖို့ စဉ်းစားနေတယ်လို့ ထိုင်းနိုင်ငံခြားရေးဝန်ကြီးဌာနရဲ့ အကြီးတန်းအရာရှိတစ်ဦးက ဒီနေ့မှာ ပြောကြားခဲ့ပါတယ်။

ဒီကိစ္စနဲ့ ပတ်သက်ပြီး ထိုင်းနိုင်ငံက နိုင်ငံတကာ အဖွဲ့အစည်းတွေနဲ့ ဆွေးနွေးနေတယ်လို့ အရာရှိ နီခွန်ဒပ် ပလမ်ခွန် က သတင်းစာရှင်းလင်းပွဲမှာ ပြောကြားခဲ့တာဖြစ်ပါတယ်။

မြန်မာပဋိပက္ခတွေမှာ ကြားနေအဖြစ် ဆက်လက်ရပ်တည်နေမယ်လို့ ထုတ်ဖော်ပြောကြားထားတဲ့ ထိုင်းနိုင်ငံဟာ ပြီးခဲ့တဲ့ မတ်လ ၂၅ ရက်က ထိုင်းနိုင်ငံမြောက်ပိုင်း တာ့ခ်ခရိုင်ကနေ နယ်စပ်ဖြတ်ကျော်ကာ ကုန်တင်ကား ၁၀ စီးနဲ့ ထောက်ပံ့ရေးအထုပ် ၄၀၀၀ ခန့် တင်ဆောင်ပြီး ကရင်ပြည်နယ်ရှိ မြို့သုံးမြို့က စစ်ဘေးရှောင်ဒုက္ခသည်တွေအတွက် လူသားချင်းစာနာမှုဆိုင်ရာ အကူအညီတွေ ပထမအကြိမ်အဖြစ် ပေးအပ်ခဲ့ပါတယ်။

ပါဆယ်ထုပ်တွေရဲ့စုစုပေါင်းတန်ဖိုးဟာ ဘတ် ၅ သန်း (ဒေါ်လာ ၁၃၈၀၀၀ ခန့်) ရှိပြီး ထောက်ပံ့ရေးပစ္စည်းတွေထဲက အများစုမှာ အစားအသောက်၊ အသင့် သောက်သုံးစရာတွေနဲ့ တစ်ကိုယ်ရည် သန့်ရှင်းရေးပစ္စည်းတွေလိုမျိုး အခြားအခြေခံပစ္စည်းတွေ ဖြစ်တယ်လို့ သတင်းတွေမှာ ဖော်ပြထားပါတယ်။

ကုလသမဂ္ဂအေဂျင်စီတွေရဲ့ အဆိုအရ မြန်မာနိုင်ငံမှာ လူပေါင်း ၂ ဒသမ ၈ သန်းကျော်က အိုးမဲ့အိမ်မဲ့ ဖြစ်နေကြရပြီး အများစုမှာ ၂၀၂၁ ခုနှစ် အာဏာအငြင်းပွားမှုဖြစ်စဉ်ပြီးနောက် ပေါ်ပေါက်လာတဲ့ တိုက်ပွဲတွေကြောင့် ဖြစ်တယ်လို့ သိရပါတယ်။ ဒါ့အပြင် ကလေးငယ် ၆ သန်း အပါအဝင် လူပေါင်း ၁၈ ဒသမ ၆ သန်းက လူသားချင်းစာနာထောက်ထားမှုဆိုင်ရာ အကူအညီတွေ လိုအပ်နေတယ်လို့လည်း အစီရင်ခံစာတွေမှာ ဖော်ပြထားပါတယ်။

Ref; The Star