၁၁. ၄. ၂၀၂၄
Written by Thettant
ရန်ကုန်တိုင်းဒေသကြီး၊ လမ်းမတော်မြို့နယ်ရှိ City Mall St.John ရှော့ပင်းစင်တာရဲ့ အဆင်း စက်လှေကားထဲ အသက်၂ နှစ်ခန့် ကလေးငယ်တစ်ဦး ခြေထောက်ညပ်မှု ဒီနေ့လယ်က ဖြစ်ပွားခဲ့ပေမဲ့ ကယ်ထုတ်ပေးနိုင်ခဲ့တယ်လို့ သိရပါတယ်။
“မီးသတ်တွေ မခေါ်ခင်ကတည်းက ကလေးက ခြေထောက်ညပ်နေတာ။ စက်လှေကား ခြေခုံနှစ်ခုကြားမှာ ကလေးခြေထောက်လေးဆိုတော့ ညပ်ဝင်သွားတာ။ ဝိုင်းထုတ်ကြတာကို ဘယ်လိုမှထုတ်မရဘူး။ အဲဒါနဲ့ မီးသတ်တပ်ဖွဲ့ကို ဖုန်းဆက်တော့မှ ညပ်နေတဲ့ခြေနင်းခုံအဆက်နှစ်ခုကြား ကလန့်ပြီး ထုတ်ရတာ။ ဒဏ်ရာတော့ရသွားတယ်။ ညပ်တဲ့နေရာလေးက သွေးတွေရွှဲနေတယ်။ ကျိုးကြေသွားတဲ့ ကြီးကြီးမားမားတော့မဟုတ်ဘူး။ ကလေးကမိန်းကလေး။ အသက်က ၂ နှစ်ကျော်လောက်ပဲ”လို့ မျက်မြင်ကူညီပေးခဲ့သူကပြောပါတယ်။
ဒီဖြစ်စဥ်နဲ့ ပတ်သက်ပြီးလည်း မီးသတ်ဦးစီးဌာနက ဒီ နေ့လယ် ၃ နာရီ ၁၀ မိနစ်အချိန်ခန့်က လမ်းမတော်မြို့နယ်၊ (၁၂) ရပ်ကွက်၊ မင်းရဲကျော်စွာလမ်းနဲ့ ပြည်လမ်းထောင့်၊ City Mall St.John မှာ ကလေးငယ် (၁)ဦး စက်လှေကားညပ်မှု ဖြစ်ပွားနေတယ် သတင်းအရ ကျောက်တံတားမြို့နယ်မီးသတ်စခန်းက မီးသတ်ယာဉ်(၁)စီး ကယ်ဆယ်ရေး ထွက်ခွာခဲ့သလို နေ့လယ် ၃ နာရီ မိနစ် ၄၀ အချိန်မှာ စက်လှေကားထဲ ခြေထောက်ညပ်နေတဲ့ ကလေးငယ်ကို ကယ်ထုတ်ပြီးစီးခဲ့တယ်လို့ သိရပါတယ်။
ဒီဖြစ်စဥ်နဲ့ ပတ်သက်ပြီး မြင်တွေ့ခဲ့တဲ့ ညီညီမောင်(စမ်းချောင်း)ကလည်း မိန်းကလေးငယ် ခြေထောက်ညပ်တဲ့ဖြစ်စဥ်ကို ခြေထောက်ညပ်မှုက ခြေမပါအတွင်းဝင်ပြီး ညပ်နေတာဖြစ်ကြောင်း၊ စင်တာ၊ ဓာတ်လှေကားကုမ္ပဏီက ကနဦးကယ်ထုတ်ကြကြောင်း၊ မီးသတ်တပ်ဖွဲ့ဝင်တွေရောက်လာမှကယ်နိုင်တာဖြစ်ပြီး ဖြစ်စဥ်ကတစ်နာရီလောက်ကြာကြောင်း၊ ဆရာဝန်တွေကလည်း အသင့်စောင့်နေသလို သူနာတင်ယာဥ်(ဆုံဆည်းရာပရဟိတအဖွဲ့) လည်း ရောက်နေပြီး အသင့်ခေါ်သွားကြောင်း၊ မိဘတွေ သတိထားသင့်ကြောင်း လူမှုကွန်ရက်မှာ မျှဝေထားပါတယ်။ (Photo – MFSD & Nyi Nyi Maung Sanchaung)
