MT News
၂၈. ၃. ၂၀၂၄
၁၃၈၅ ခုနှစ် မဟာသင်္ကြန်ရေသဘင်ပွဲတော်အတွက် ကျောက်တံတားမြို့နယ်၊ မြို့တော်ခန်းမရှေ့ ဖျော်ဖြေရေးမဏ္ဍပ်၊ ရေကစားမဏ္ဍပ်၊ မဟာဗန္ဓုလလမ်းနှင့် ကုန်သည်လမ်းအကြား မဟာဗန္ဓုလပန်းခြံလမ်းတစ်လျှောက် လမ်းလျှောက်သင်္ကြန်နှင့် ပြည်သူ့ရင်ပြင်ရေကစားမဏ္ဍပ်နှင့် လမ်းလျှောက်သင်္ကြန်ကျင်းပရေးကြိုတင်ပြင်ဆင်နေပြီး အဆိုပါလမ်းလျှောက်သင်္ကြန်များတွင် စားသောက် ဆိုင်ခန်း ၁၅၀ ကိုလည်း ထည့်သွင်းသွားမည်ဖြစ်သည်။
မြို့တော်ခန်းမရှေ့ ဖျော်ဖြေရေးမဏ္ဍပ်သည် အလျား ၉၄ ပေ၊ အနံ ၄၈ ပေရှိပြီး ရေကစားမဏ္ဍပ်သည်အလျား ၁၁၀ ပေ၊ အနံ ၂၄ ပေရှိကြောင်း သိရသည်။ ကျောက်တံတားမြို့နယ်၊ မဟာဗန္ဓုလလမ်းနှင့် ကုန်သည်လမ်းအကြား မဟာဗန္ဓုလပန်းခြံ လမ်းတစ်လျှောက် လမ်းလျှောက်သင်္ကြန်ပွဲခင်းကိုလည်း ပြင်ဆင်နေပြီး အလျား ၄၀ ပေ၊ အနံ ၁၆ ပေ၊ အမြင့် ၄ ပေရှိဖျော်ဖြေရေးမဏ္ဍပ်တည်ဆောက်နေသည်။ အဆိုပါ လမ်းလျှောက်သင်္ကြန်တွင် လမ်းတစ်လျှောက်ရေမှုန်ရေမွှားလျှောက်လမ်း၊ ရေကစားမဏ္ဍပ်များ၊ ဂီတအနုပညာရှင်များ၏ ဖျော်ဖြေရေးမဏ္ဍပ်တို့နှင့်အတူ စားသောက်ဆိုင်ခန်းပေါင်း (၁၅၀)ပါ ထည့်သွင်း ဆောင်ရွက်သွားမည်ဖြစ်သည်။
အလားတူ ၁၃၈၅ ခုနှစ် မဟာသင်္ကြန်ရေသဘင်ပွဲတော် ပြည်သူ့ရင်ပြင် ရေကစားမဏ္ဍပ်နှင့် လမ်းလျှောက်သင်္ကြန်တွင်လည်း ရေမှုန်ရေမွှား လျှောက်လမ်းများနှင့် ရောင်စုံထီးများဖြင့်အလှဆင်ဆောင်ရွက်နေမှု၊ ရေကစားမဏ္ဍပ်များနှင့်ဖျော်ဖြေရေးမဏ္ဍပ်တည်ဆောက်နေမှု၊ တောင်ထန်းတဲများနေရာချထားမှု၊ ရေပိုက်များသွယ်တန်းနေပြီး မြို့တော်ဝန်ဦးဗိုလ်ဌေးက ယမန်နေ့တွင် သွားရောက်စစ်ဆေးစဥ် ရေကစားမဏ္ဍပ်များနှင့်ဖျော်ဖြေရေးမဏ္ဍပ်များအား ကြံ့ခိုင်ကောင်းမွန်အောင်တည်ဆောက်ရန်၊ မြန်မာ့ရိုးရာ သင်္ကြန်သင်္ကေတ ဖြစ်သည့် အုန်းလက်များဖြင့် အလှဆင်ရန်၊ ပြည်သူများစိတ်အေးချမ်းမြေ့စွာရေကစားနိုင်ရေး တာဝန်ရှိသူများက ပူးပေါင်းဆောင်ရွက်ကြရန် မှာကြားထားသည်။
ပုံစာ။ ယခုနှစ် ရန်ကုန်လမ်းလျှောက်သင်္ကြန်အတွက် ကြိုတင်ပြင်ဆင်မှုမြင်ကွင်းများ(News & Photo Ref., YCDC)
