၂၇. ၃. ၂၀၂၄
Written by TZ
ရန်ကုန်တိုင်းဒေသကြီး၊ အင်းစိန်မြို့နယ် (ဘုရင့်နောင်) လမ်းမကြီး၊ ကြို့ကုန်းမီးပွိုင့်အနီးတွင် YBS-၈၂ ခရီးသည်ယာဥ်မှာ အရှိန်လွန်၍ လမ်းဘေးရှိဓာတ်တိုင်အား ဝင်တိုက်မိရာ ခရီးသည် ၁၁ ဦးဒဏ်ရာရရှိခဲ့ကြောင်း သိရသည်။
အဆိုပါဖြစ်စဥ်မှာ ယနေ့ မတ်လ ၂၇ ရက် နေ့လယ် ၁ နာရီ ၄၅ မိနစ် အချိန်တွင်ဖြစ်ပွားခဲ့ခြင်းဖြစ်ပြီး တွဲလက်လူမှုကူညီရေးအသင်းသို့ တာဝန်သိပြည်သူများမှ ဖုန်းဆက်အကြောင်း ကြားသောကြောင့် ဖြစ်စဥ်နေရာသို့ ဒေသခံလူမှုကူညီရေးအသင်းများနှင့်အတူ သွားရောက်ကူညီခဲ့ကြောင်း သိရသည်။
“ယာဥ်မောင်းကတော့ ထွက်ပြေးသွားတယ်။ ဒဏ်ရာရတာက (၁၁) ဦး။ ယာဥ်ကတော့ ခေါင်းပိုင်းပျက်စီးသွားတယ်”ဟု တွဲလက်လူမှုကူညီရေးအသင်း တာဝန်ရှိသူတစ်ဦးက MT news သို့ ဖြေဆိုသည်။
ထိုဒဏ်ရာရရှိသူများကို စိန်ရတနာနာရေးကူညီမှုအသင်း၊ အနာဂတ်သွေးနှင့်လူမှုကူညီရေးအသင်း၊ တွဲလက်လူမှုကူညီရေးအသင်းတို့မှ အင်းစိန်ပြည်သူ့ဆေးရုံကြီးသို့ ပို့ဆောင်ပေးခဲ့ကြောင်း သိရသည်။
Photo -တွဲလက်လူမှုကူညီရေးအသင်း
