၁၀. ၁၂. ၂၀၂၂
Written by Pan Ei
ဂရမ်မီဆုရ အဆိုတော် တေလာဆွစ်ဖ်ဟာ သူမကိုယ်တိုင် ရေးသားထားတဲ့ ဇာတ်ညွှန်းနဲ့ ရိုက်ကူးမယ့်ရုပ်ရှင်မှာ ဒါရိုက်တာတစ်ယောက်အနေနဲ့ ပွဲဦးထွက် ရိုက်ကူးသွားမှာ ဖြစ်တယ်လို့ Searchlight Pictures က ဒီဇင်ဘာ ၉ ရက်မှာ ထုတ်ပြန်ခဲ့ပါတယ်။
အော်စကာတန်းဝင်ရုပ်ရှင်ကားတွေ ဖြစ်ကြတဲ့ The Shape of Water၊ Nomadland အစရှိတဲ့ ဇာတ်လမ်းတွေအပြင် ၂၀၂၂ ခုနှစ်အတွင်းမှာ ထွက်ရှိခဲ့တဲ့ The Banshees of Inisherin တို့ကို ရိုက်ကူးခဲ့တဲ့ Searchlight Pictures ဟာ တေလာဆွစ်ဖ်ရဲ့ရုပ်ရှင် ဘယ်အချိန်မှာ ထွက်ရှိလာမလဲဆိုတာကိုတော့ အတိအကျ ထုတ်ဖော်ပြောကြားခြင်းမရှိသေးပါဘူး။
တေလာဆွစ်ဖ်ဟာ အဆိုတော်အဖြစ် အောင်မြင်ကျော်ကြားနေတဲ့ အနုပညာရှင်တစ်ယောက်ဖြစ်ရုံသာမကဘဲ The Giver၊ Valentine’s Day စတဲ့ ရုပ်ရှင်တွေမှာလည်း သရုပ်ဆောင်တစ်ယောက်အနေနဲ့ မြင်တွေ့ခဲ့ကြရပါသေးတယ်။ ဒါပေမယ့် ရုပ်ရှင် ဒါရိုက်တာတစ်ယောက်အနေနဲ့ ရုပ်ရှင် ရိုက်ကူးဖန်တီးဖူးခြင်းတော့ မရှိသေးပါဘူး။
တေလာဆွစ်ဟာ ဂရမ်မီဆု ၁၁ ကြိမ်ရရှိခဲ့ပြီး ဂရမ်မီသမိုင်းမှာ တစ်နှစ်တာအကောင်းဆုံးအယ်လ်ဘမ်ဆုကို ၃ ကြိမ်ရရှိထားတဲ့ တစ်ဦးတည်းသော အမျိုးသမီးအနုပညာရှင်ဖြစ်ပါတယ်။ ၂၀၂၂ ခုနှစ်အတွက် ကျင်းပခဲ့တဲ့ MTV EMAs ဆုပေးပွဲမှာလည်း Best Video ဆုအပါအဝင် ဆုလေးဆုရရှိခဲ့ပြီး ဆုရအများဆုံး အနုပညာရှင်ဖြစ်ခဲ့ပါတယ်။
Ref; CNA
