၂၆.၃.၂၀၂၄
Written by KL
ရန်ကုန်တိုင်းဒေသကြီး၊ အင်းစိန်မြို့နယ်၊ ကြို့ကုန်းအရှေ့ရပ်ကွက်၊ မဟာသုခိတာလမ်းရှိ ရေမြောင်းစပ်တွင် မတ်လ ၂၆ ရက် နံနက် ၁၀ နာရီ ၄၀ မိနစ်ခန့်က ပုပ်ပွသေဆုံးနေသော အမျိုးသားတစ်ဦး၏ ရုပ်အလောင်းကိုတွေ့ရှိခဲဲ့ကြောင်း တွဲလက်လူမှုကူညီရေးအဖွဲ့မှ အဖွဲ့ဝင်တစ်ဦးက ပြောသည်။
သေဆုံးသူမှာ အသက် ၄၅ နှစ်အရွယ် ဦးသူရအောင်ဖြစ်ပြီး တောင်ဥက္ကလာပမြို့နယ်၊ ၁၂ ရပ်ကွက်တွင် နေထိုင်သူဖြစ်ကြောင်း၊ သေဆုံးသူတွင် ပြင်ပဒဏ်ရာ မတွေ့ရှိရကြောင်း အလောင်းသွားရောက် သယ်ဆောင်ကူညီပေးသည့် တွဲလက်လူမှုကူညီရေးအဖွဲ့ထံမှ သိရသည်။
“ရေမြောင်းအစပ်မှာ မှောက်လျက်ကျပြီး သေဆုံးနေတာ။ သေတာက သုံးရက်လောက်ရှိပြီလို့ ယူဆရတယ်။ အသားက ရိနေပြီ။ အလောင်းကို အိတ်ထဲ ထည့်ဖို့တောင် ထိန်းထည့်ရတယ် “ဟု အလောင်းသယ်ဆောင်ခဲ့သူတစ်ဦးက ပြောသည်။
အဆိုပါ သေဆုံးမှုနှင့်ပတ်သက်၍ မိသားစုဖြင့် ချိတ်ဆက်ကာ တွဲလက်လူမှုကူညီရေးအဖွဲ့မှ အဖွဲ့ဝင် ၄ ဦးက အင်းစိန်ပြည်သူ့ဆေးရုံကို ပို့ဆောင်ပေးခဲ့ရာ ဆေးရုံက ပီအာရ် ၂၅ ဖြင့် လက်ခံထားကြောင်း သိရသည်။
