၂၃.၃.၂၀၂၄
Written by KL
ရှမ်းပြည်နယ်အရှေ့ပိုင်း၊ တာချီလိတ်မြို့၊ ဆန်ဆိုင်း(က) ရပ်ကွက်တွင် မတ်လ၂၂ရက် ညနေ ၄ နာရီခန့်က နေအိမ် မီးလောင်မှုဖြစ်ပွားခဲ့ရာမှာ အသက် ၆၂ နှစ်အရွယ် လေဖြတ်နေသူအမျိုးသားတစ်ဦး သေဆုံးခဲ့ကြောင်း သိရသည်။
သေဆုံးသူ အသက် ၆၂ နှစ်အရွယ် ဦးစိုင်းနွံမှာ မီးလောင်ဒဏ်ရာများဖြင့် နေအိမ်အပေါ်ထပ်တွင် သေဆုံးခဲ့ခြင်းဖြစ်သည်။
အဆိုပါ မီးလောင်မှုမှာ မိနစ် ၂၀ ကြာမြင့်ခဲ့ပြီး တာချီလိတ်မြို့နယ် မီးသတ်တပ်ဖွဲ့ဝင်များနှင့် ဒေသခံလူမှုကူညီရေးအဖွဲ့ဝင်များ၊ ဒေသခံများက ဝိုင်းဝန်းငြှိမ်းသတ်ခဲ့ကြသည်။
သေဆုံးသူ၏ရုပ်အလောင်းကို တာချီလိတ်ပြည်သူ့ဆေးရုံရှိ ရင်ခွဲရုံသို့ ပို့ဆောင်ပြီးနောက် ပုံလို့(မြို့မ)သုသာန်တွင် မီးသင်္ဂြိုဟ်ပေးခဲ့ကြောင်း ဦးလှမိုး (တာချီလိတ်)လူမှုကူညီရေးအသင်းထံမှ သိရသည်။
