၂၂. ၃. ၂၀၂၄
Written by Hey Mar
မကွေးတိုင်းဒေသကြီး၊ သရက်ခရိုင်၊ မင်းတုန်းမြို့နယ်အပိုင်အတွင်းက မှန်ကျေးရွာမှာ ဒီနေ့ မတ်လ ၂၂ ရက် ညနေ ၃ နာရီ ကျော်ခန့်က တောမီးကတစ်ဆင့် မီးလောင်မှု ဖြစ်ပွားပြီး ရွာရှိအိမ်ခြေအကုန်နီးပါး မီးထဲ ပါသွားတယ်လို့ ဒေသခံတချို့ထံကနေ သိရပါတယ်။
ရွာမှာ အိမ်ခြေ ၁၈၀ ကျော်ရှိပြီး အိမ်ထောင်စု ၇၀ နီးပါးနဲ့ လူဦးရေ ၁၀၀၀ နီးပါးရှိတဲ့ ရွာဝိုင်းသဏ္ဍာန် တည်ထားတဲ့ရွာလို့ သိရပါတယ်။ မီးလောင်မှုဖြစ်ပွားတဲ့ သတင်းရရှိတာကြောင့် မင်းတုန်းမြို့နယ်မီးသတ်စခန်းက မီးငြှိမ်းသတ်ယာဉ်(၁)စီး၊ ရေသယ်ယာဉ်(၃)စီး၊ မယ်ဇလီနယ်မြေမီးသတ်စခန်းက မီးငြှိမ်းသတ်ယာဉ်(၁)စီး၊ ကျောက်တိုင်နယ်မြေမီးသတ်စခန်းက ရေသယ်ယာဉ်(၁)စီးတို့နဲ့ ထွက်ခွာငြှိမ်းသတ်ခဲ့ရာ ၄ နာရီ ၂၅ မိနစ်အချိန်မှာ မီးထိန်းနိုင်ခဲ့ပြီး ၆ နာရီ ၁၀ မိနစ်မှာ မီးငြိမ်းတယ်လို့ သိရပါတယ်။
လက်ရှိအချိန်မှာတော့ ရွာသူရွာသားတွေက အဆင်ပြေတဲ့နေရာမှာ ခေတ္တနေထိုင်နေကြပြီး တချို့ဆို လူအလွတ်သာရှောင်နိုင်တဲ့အတွက် အဝတ်အစားတောင် ခါးဝတ်ခါးစားသာပါတဲ့အခြေအနေလို့ ဒေသတစ်ဦးထံကနေ သိရပါတယ်။ အဆိုပါ မီးလောင်မှုဖြစ်စဥ်ကြောင့် လူထိခိုက်မှု မရှိပေမယ့် တိရစ္ဆာန် နဲ့ ပျက်စီးဆုံးရှုံးမှုကိုတော့ သက်ဆိုင်ရာက စုံစမ်းလျှက်ရှိတယ်လို့လည်း သိရပါတယ်။
