၂၂.၃.၂၀၂၄
Written by Thin Zar
မန္တလေးတိုင်းဒေသကြီး၊ မိတ္ထီလာခရိုင်၊ မိတ္ထီလာမြို့၊ ရတနာမာန်အောင်ရပ်ကွက်၊ နယ်မြေ ( ၄) ရှိ ရွှေပြည်စိုးစက်ဆီဆိုင်တွင် စျေးဝယ်ယူရန်ရပ်ထားသည့် မော်တော်ဆိုင်ကယ်ကို ခိုးယူမောင်းနှင်ထွက်ပြေးသည့် အမျိုးသားအား ပတ်ဝန်းကျင်ရှိပြည်သူများမှ ဝိုင်းဝန်း ဖမ်းဆီးရရှိကြောင်း သိရသည်။
ဖြစ်စဥ်မှာ ယနေ့ မတ်လ ၂၂ ရက် မွန်းတည့် ၁၂ နာရီဝန်းကျင်တွင် Wave မော်တော်ဆိုင်ကယ်ဖြင့် စျေးလာရောက်ဝယ်သူမှ မော်တော်ဆိုင်ကယ်အား ရပ်ပြီး စျေးဝယ်နေစဥ်အတွင်း အမျိုးသားတစ်ဦးမှ ၎င်း၏ဆိုင်ကယ်ကို ခိုးယူမောင်းနှင်ထွက်ပြေးသွားကြောင်း သိရသည်။
အဆိုပါမြင်ကွင်းကို အနီးအနားရှိပြည်သူများမှ မြင်၍ လိုက်လံဖမ်းဆီးရာ မော်တော်ဆိုင်ကယ်နှင့်အတူ ခိုးယူသည့် အမျိုးသားကိုလည်း ဖမ်းဆီးရရှိခဲဲကြောင်း သိရသည်။
ထို့နောက် ဖမ်းဆီးပေးသည့် ပြည်သူများမှ ဆိုင်ကယ်ခိုးယူသူ သန့်ဇင်အောင်ထံမှ T ပုံသဏ္ဌာန် သော့တု (၁) ချောင်းနှင့် ဓားဦးချွန် (၁)ချောင်းတို့ကိုလည်း သိမ်းဆည်းရရှိကြောင်း၊ ထိုအမျိုးသားကို ရပ်ကွက်တာဝန်ရှိသူများမှ သက်ဆိုင်ရာသို့ ပို့ဆောင်လိုက်ကြောင်း သိရသည်။
