၂၂. ၃. ၂၀၂၄
Written by Nay Moe
မကွေးတိုင်း၊ ရေနံချောင်းမြို့နယ်၊ အုတ်ရှစ်ကုန်းအုပ်စု အုပ်ချုပ်ရေးမှူးဦးတင်ဝင်းနိုင်နဲ့ ထွေအုပ်စာရေးဦးစန်းနိုင် ဆိုသူတို့ကို အုတ်ရှစ်ကုန်းကျေးရွာအုပ်စုအတွင်း စစ်မှုထမ်းဥပဒေအရ အသိပေးဆောင်ရွက်မှုလုပ်ဆောင်နေတာကြောင့် သတ်ပစ်လိုက်တယ်လို့ ရေနံချောင်းမြို့နယ်ပြည်သူ့ကာကွယ်ရေးတပ်ဖွဲ့က ပြောပါတယ်။
ဖြစ်စဥ်က မကွေးတိုင်းဒေသကြီး၊ ရေနံချောင်းမြို့နယ်၊ အုတ်ရှစ်ကုန်းကျေးရွာနေသူတွေ ဖြစ်ကြတဲ့ ဦးတင်ဝင်းနိုင်(၄၉) နှစ်နဲ့ ဦးစန်းနိုင် (၅၀) နှစ်တို့ဟာ မတ်လ ၂၀ ရက်ည ၉ နာရီအချိန် ရေနံချောင်းမြို့ကနေ နေအိမ်ဆီ ဆိုင်ကယ်နဲ့ ပြန်လာချိန် အုတ်ရှစ်ကုန်းကျေးရွာအနီး ဖောင်းကွဲချောင်း (ဒေသအခေါ်) ထိပ်အရောက်မှာ ရေနံချောင်း PDF တွေက သတ်ပစ်လိုက်တာပါ။
ရေနံချောင်း PDF တွေဟာ ဦးတင်ဝင်းနိုင်နဲ့ ဦးစန်းနိုင်ကို သတ်ပစ်တဲ့အပြင် သူတို့ရဲ့ ငွေကြေးနဲ့စာရွက်စာတမ်းပစ္စည်းတွေ၊ လက်ကိုင်ဖုန်းနှစ်လုံးနဲ့ ဆိုင်ကယ်တစ်စီးကိုပါလုယက် ယူဆောင်သွားခဲ့ကြတယ်လို့လည်း သိရပါတယ်။
