ကားပျက်လို့ လမ်းပေါ်ရပ်ထားတဲ့ယာဥ်ရဲ့ နောက်ပိုင်းကို ဝင်တိုက်မိတဲ့ ဆိုင်ကယ်စီးနင်းသူ ရရှိတဲ့ဒဏ်ရာတွေနဲ့ နေရာတင်သေဆုံးမှု နေပြည်တော်မှာဖြစ်ပွား

၂၁. ၃. ၂၀၂၄
Written by HeyMar

ကာားပျက်လို့ လမ်းပေါ်ရပ်ထားတဲ့ တွဲကားကို ဆိုင်ကယ်က နောက်ကနေဝင်တိုက်တာကြောင့် ဆိုင်ကယ်မောင်းနှင်လာသူ နေရာတင်သေဆုံးခဲ့တဲ့ဖြစ်စဥ် မနေ့က မတ်လ ၂၀ ရက် ည ၉ နာရီ ၃၀ မိနစ်ခန့်က နေပြည်တော်၊ ဇေယျသီရိမြို့နယ်မှာ ဖြစ်ပွားခဲ့တယ်လို့ ဒေသခံလူမှုကူညီရေး အသင်းထံကနေ သိရပါတယ်။

ဖြစ်စဥ်က ဇေယျာသီရိမြို့နယ်၊ နန်းသြကျေးရွာအုပ်စု၊ သိုက်ချောင်းလမ်းဆုံအနီး မိုင်တိုင်အမှတ် ၂၃၃/၁ အနီးမှာ ဖြစ်ပွားခဲ့ပြီး၊ ယာဥ်မောင်း ဝေယံဟိန်း (၂၈ နှစ်) မောင်းနှင်တဲ့၊ ယာဥ်အမှတ် 7N/6096 FENE ၂၄ ဘီး အဝါရောင်ယာဥ်ဟာ နောက်တာယာ ၂ လုံးပွင့်ထွက်သွားတာကြောင့် ရပ်ထားစဥ် ရေဆင်းဘက်ကနေ သိုက်ချောင်းဘက်ကို ကိုဇော်မိုက် (၃၆ နှစ်) ကုလားရွာကျေးရွာ၊ ပုဗ္ဗသီရိမြို့နေထိုင်သူ၊ စီးနင်းမောင်းနှင်လာတဲ့ 82W/18539 HONDA အမဲရောင်ဆိုင်ကယ်က အရှိန်မထိန်းနိုင်ဘဲ ကားနောက်ပိုင်းကို ဝင်ရောက်တိုက်မိတာလို့ သိရပါတယ်။

ဖြစ်စဥ်ကို မြေပြင်အကူအညီသွားရောက်ခဲ့ ကရုဏာရှင်လူမှုကူညီရေးအသင်းတာဝန်ရှိသူက “ကားက လမ်းပေါ်ရပ်ထားတာပါ။ သစ်ကိုင်းတွေတော့ ချထားပါတယ်။ ဆိုင်ကယ်သမားက ဖုန်းပြောရင်းမောင်းလာတော့ တိုက်မိတာ” လို့ MT News ကို ပြောပါတယ်။

အဆိုပါ ယာဥ်မတော်တဆမှုဖြစ်စဥ်ကြောင့် ဆိုင်ကယ်မောင်းနှင်သူ ကိုဇော်မိုက်မှာ ရရှိတဲ့ ဒဏ်တွေနဲ့ အခင်းဖြစ်နေရာတင် သေဆုံးသွားခဲ့​တာကြောင့် သက်ဆိုင်ရာ တာဝန်ရှိသူတွေရဲ့ စုံစမ်းစစ်ဆေးမှုတွေအပြီးမှာ ရုပ်အလောင်းကို နေပြည်တော်ကုတင်(၁၀၀၀) ဆေးရုံဆီ ပို့ဆောင်ထားရှိ​ခဲ့တယ်လို့ သိရပါတယ်။

ယာဥ်မတော်တဆမှုဖြစ်စဥ်ကို အမှုဖွင့်အရေးယူဆောင် ရွက်နိုင်ရေးအတွက် နေပြည်တော်ယာဥ်မှုစစ်က ဆက်လက်စစ် ဆေးဆောင်ရွက်လျက်ရှိ​တယ်လို့ သိရပါတယ်။