၂၀.၃.၂၀၂၄
Written by KL
ရှမ်းပြည်နယ်(မြောက်ပိုင်း)၊ သီပေါမြို့နယ်၊ တာပုတ်ရွာအနီး နန့်ပေါ့တံတားအထက်၊ ဒုဌဝတီမြစ်တွင် ရေဆင်းကူးသော လူငယ်နှစ်ဦး ရေနစ်သေဆုံးမှု မတ်လ ၁၉ ရက် ညနေပိုင်းက ဖြစ်ပွားခဲ့ကြောင်း ကယ်ဆယ်ရေးဆောင်ရွက်ခဲ့သူများထံမှ သိရသည်။
အသက် ၁၄ နှစ်အရွယ် လူငယ်နှစ်ဦးမှာ ဒုဌဝတီမြစ်အတွင်း ရေဆင်းကူးရာမှ ရေနစ်ခဲ့ခြင်းဖြစ်ပြီး ဒေသခံလူမှုကူညီရေးအသင်းများမှ အဖွဲ့ဝင်များနှင့်ဒေသခံများက မြစ်ထဲ ရေငုပ်ရှာဖွေကြရာ ရှာဖွေချိန် ၁ နာရီခန့်အကြာတွင် သေဆုံးသူ၂ ဦး၏ရုပ်အလောင်းများကို ပြန်လည်တွေ့ရှိခဲ့ကြောင်း သိရသည်။
“သေဆုံးတဲ့နှစ်ယောက်က သူငယ်ချင်းတွေပါ။ တစ်ယောက်က မြန်မာရပ်မှာနေတာ။ တစ်ယောက်က ဘူတာရပ်မှာနေတာ”ဟု ရေနစ်သူနှစ်ဦးကို သွားရောက်ကယ်ဆယ်ခဲ့သည့် သီပေါလူငယ်လူမှုကူညီရေးအသင်းမှအဖွဲ့ဝင်တစ်ဦးက ပြော သည်။
ရေနစ်သေဆုံးသူနှစ်ဦးကို သီပေါမြို့နယ်ပြည်သူ့ဆေးရုံသို့ ပို့ဆောင်ခဲ့ပြီး ထိုမှတစ်ဆင့် နေအိမ်သို့ပို့ဆောင်ကူညီပေးခဲ့ကြောင်း သီပေါလူငယ်လူမှုကူညီရေးအသင်းထံမှသိရသည်။
