၁၉. ၃. ၂၀၂၄
Written by KL
ပဲခူးတိုင်းဒေသကြီး၊ ပြည်မြို့အဝင်၊ ဆင်မကြပ်လမ်းဆုံအနီး မြို့ရှောင်လမ်းတွင် မတ်လ ၁၈ ရက် ည ၈ နာရီမိနစ် ၄၀ ခန့်က သံဃာတစ်ပါး မောင်းလာသော Honda Fit ယာဥ်မှာ သစ်ပင်ကို ဝင်တိုက်မိရာမှ သံဃာ၂ ပါးအပါအဝင် သာသနာ့နွယ်ဝင် ၆ဦး ထိခိုက်ဒဏ်ရာရရှိခဲ့ကြောင်း သိရသည်။
“ကားက ရွှေနတ်တောင်ကနေ ပြန်လာတာ။ အပြန်မှာကားတစ်စီးကို ရှောင်ရင်း သစ်ပင်ကိုဝင်တိုက်မိတာ။ ယာဥ်မောင်းတဲ့ ဦးဇင်းကတော့သတိမရဘူး။ လူနာတွေက အသက်အန္တရာယ် မစိုးရိမ်ရဘူး”ဟု လူနာများကို ကယ်ထုတ်ရာတွင် ပါဝင်သူတစ်ဦးက ပြောသည်။
ဒဏ်ရာရသူများမှာ အသက် ၅၀ ဝန်းကျင်ရှိကြသောသံဃာ ၂ ပါး ၊ သီလရှင် ၂ ပါးနှင့် အသက် ဆယ်နှစ်ကျော်အရွယ် ကိုရင် ၁ ပါး၊ ဖိုးသူတော် ၁ ပါးတို့ ပါဝင်ပြီး နဖူးကွဲ၊ မျက်လုံးဖူးယောင် ၊ နားထင်ကွဲ ဒဏ်ရာနှင့် အခြား ထိခိုက်ဒဏ်ရာများ ရရှိခဲ့ကြောင်း သိရသည်။
ဒဏ်ရာရရှိသူများကို မြေပြင် အရေးပေါ် ကုသပြုစုပေးခဲ့ပြီး ပြည်မြို့ ပြည်သူ့ဆေးရုံကြီး အရေးပေါ် ဌာနသို့ ပို့ဆောင်ပေးခဲ့ကြောင်း မြန်မာနိုင်ငံ လူမှုကယ်ဆယ်ရေးအဖွဲ့ (ပြည်) ပရဟိတပါရမီထံမှ သိရသည်။
