၁၈. ၃. ၂၀၂၄
Written by Hey Mar
စိတ်ညစ်လို့ဆိုပြီး ကိုရင်တစ်ပါး ကြွေဂျီးချွတ်ဆေး(အက်စစ်) သောက်လိုက်တဲ့ ဖြစ်စဥ် ဒီနေ့ မတ်လ ၁၈ ရက်နေ့ မနက်အစောပိုင်းက ရွှေပြည်သာမြို့နယ်မှာ ဖြစ်ပွားခဲ့တယ်လို့ မြေပြင်အကူအညီသွားရောက်ခဲ့တဲ့ မြင့်မြတ်စေတနာ လူမှုကူညီရေးအသင်းထံကနေ သိရပါတယ်။
ကိုရင်က အသက် ၂၇ နှစ်အရွယ် ဖြစ်ပြီး မနေ့က မတ်လ ၁၇ ရက်နေ့ကမှ စတင်ကာ သာသနာ့ဘောင်ကို ဝင်ရောက်တာဖြစ်ပြီး၊ အရက်ပြတ်အောင် မိသားစုက ကိုရင်ဝတ်ပေးလိုက်တာလို့ သိရပါတယ်။ ကိုရင်က ရွှေပြည်သာ ရတနာသိင်္ဂီ ကျောင်းတိုက်မှာလက်ရှိ သီတင်းသုံးတာလို့ သိရပါတယ်။
မြေပြင်ကူညီမှု ဆောင်ရွက်ခဲ့သူ မြင့်မြတ်စေတနာပရဟိတအသင်းမှ တာဝန်ရှိသူက ” ဂျီးချွတ်ဆေးက လက်နှစ်ဆစ်လောက်ဝင်သွားတယ်လို့ ပြောတယ်။ အခြေအနေက ၅၀ -၅၀ လောက်ပဲ။ သွေးအတုံးအခဲတွေ အန်တယ်။ အာခေါင်တွေ ပေါက်ပြဲနေတာ။ အစာအိမ်တွေ အူတွေ အတော်ထိလောက်တယ်။ သွေးကြောထဲက သွေးတွေတောင် ပျစ်လာတာမျိုး စုပ်ယူလို့ မရတာမျိုးပေါ့။ ဆေးရုံမှာကုသမှုခံယူနေတော့ မြင်တွေ့ခဲ့ရတာပါ။ မနက် ၄နာရီလောက်က ဖြစ်တာ” လို့ ပြောပါတယ်။
လက်ရှိမှာတော့ ကြွေဂျီးချွတ်ဆေး သောက်လိုက်တဲ့ ကိုရင်ကို အင်းစိန်ဆေးရုံကြီးဆီ မြင့်မြတ်စေတနာ လူမှုကူညီရေးအသင်းက ကူညီပို့ဆောင်ပေးခဲ့ပြီး ဆေးဝါးကုသမှုဆက်လက်ခံယူနေဆဲလို့ သိရပါတယ်။
