၁၄.၃.၂၀၂၄
Written by KL
ရန်ကုန်တိုင်းဒေသကြီး ကြည့်မြင်တိုင်မြို့တစ်ဖက်ကမ်းရှိ စက်ဆန်းရပ်ကွက် နဝဒေးလမ်းတွင် ဒယ်နီအိုးအပူလွန်ကဲရာမှ လူနေအိမ် ၁၁လုံး မီးလောင်ဆုံးရှုံးမှု မတ်လ ၁၃ ရက် ည ၇ နာရီခန့်က ဖြစ်ပွားခဲ့သည်။
ဖြစ်စဥ်မှာ အလျား ၁၅ ပေ ၊ အနံ ၁၀ ပေ ရှိ သွပ်မိုး၊ ပျဥ်ထောင်နေအိမ်၏ မီးဖိုချောင်တွင် ဒယ်နီအိုး အပူလွန်ကဲရာမှ မီးစတင်လောင်ကျွမ်းခဲ့ရာ မီးလောင်ချိန် မိနစ် ၄၀ ကျော်ကြာမြင့်ခဲ့ပြီး ပျဥ်ထောင်၊ သွပ်မိုးနေအိမ် ၁၁ လုံး မီးလောင်ဆုံးရှုံးခဲ့သည်။
“လောင်တဲ့အချိန်ကလည်း လေအရမ်းတိုက်နေတာ။ ကမ်းနားဘက်ဆိုတော့ ခဏလေးနဲ့အိမ်တွေပါကုန်တာ။ လမ်းကလည်း ကျဥ်းတော့ မီးသတ်ကားတွေ တော်တော်နဲ့ဝင်မရဘူး”ဟု မီးငြှိမ်းသတ်သူ တစ်ဦးက ပြောသည်။
နေအိမ် ၁၁ လုံး မီးလောင်မှုကို မီးငြှိမ်းသတ်ယာဥ် ၈ စီး၊အုပ်ချုပ်မှုယာဥ် ၁ စီး၊ အပေါ့စားမီးသတ်စက် ၈ လုံးဖြင့် မီးသတ်တပ်ဖွဲ့ဝင် ၁၁၀ ကျော်က မီးငြှိမ်းသတ်ခဲ့ရသည်။
ထိုမီးလောင်မှုကြောင့် အသက် ၄၄ နှစ်အရွယ် ဦးကိုကိုအောင်ကို ပုဒ်မ ၂၈၅ ဖြင့် စက်ဆန်းနယ်မြေရဲစခန်းက အမှုဖွင့်အရေးယူထားသည်ဟု သိရသည်။
