၁၂. ၃. ၂၀၂၄
Written by KL
မွန်ပြည်နယ် မော်လမြိုင်မြို့၊ သွေးသောက်ရပ်ကွက်တွင် မတ်လ ၁၁ ရက် ည ၈ နာရီခွဲခန့်က အရက်မူးနေသော အသက် ၅၀ ကျော်အရွယ် အမျိုးသားကြီးတစ်ဦး မီးပုံထဲပြုတ်ကျမှု ဖြစ်ပွားခဲ့သည်။
အမူးလွန်နေသူ အမျိုးသားမှာ အမှိုက်များမီးရှို့ထားသော မီးပုံထဲသို့ အရှိန်လွန်ကာ နောက်ပြန် ပြုတ်ကျခဲ့ခြင်းဖြစ်ပြီး ကျောတစ်ခြမ်းလုံး၊ ခြေထောက်နှင့် ဘယ်ညာလက်တို့တွင် အရေပြားများ မီးလောင်ဒဏ်ရာ ရရှိခဲ့ကြောင်းကယ်ဆယ်ဆောင်ရွက်ခဲ့သော ဘိုဘိုဝင်း Rescue အရေးပေါ်ကယ်ဆယ်ရေးအဖွဲ့ဝင်တစ်ဦးက ပြောသည်။
“အမှိုက်တွေ မီးပုံရှို့ထားတဲ့ဖိုထဲကို ကျတာ။ ကျတဲ့အချိန်က သိပ်မကြာပေမယ့် အပေါ်အရေပြားတွေတော့ တော်တော်မီးလောင်သွားတယ်”ဟု ကယ်ဆယ်ရေးအဖွဲ့ဝင်တစ်ဦးက ရှင်းပြသည်။
မီးလောင်ဒဏ်ရာရရှိသော အမျိုးသားမှာ ခန္ဓာကိုယ်အပြင်ပိုင်းကိုသာ မီးလောင်ခံခဲရ၍ ကိုယ်တွင်းအစိတ်အပိုင်းများကို မထိခိုက်သဖြင့် အသက်အန္တရာယ် စိုးရိမ်ဖွယ်ရာ မရှိကြောင်း သိရသည်။
မီးလောင်ဒဏ်ရာရရှိသူကို ဘိုဘိုဝင်း Rescue အရေးပေါ်ကယ်ဆယ်ရေးအဖွဲ့မှ အဖွဲ့ဝင် ၄ ဦးက ကူညီကယ်ဆယ်ရေးများ လုပ်ဆောင်ခဲ့ပြီး မော်လမြိုင်ပြည်သူ့ဆေးရုံကြီးသို့ ပို့ဆောင်ပေးခဲ့ကြောင်း သိရသည်။
