MT News
Written by Tha Doe
ကုလသမဂ္ဂလူ့အခွင့်အရေးကောင်စီ၏ (၅၁) ကြိမ်မြောက် ပုံမှန်အစည်းအဝေး၌ မြန်မာနိုင်ငံဆိုင်ရာ အထူးအစီရင်ခံစာတင်သွင်းသူ၏ နှုတ်ဖြင့် အစီရင်ခံတင်ပြမှုတွင် NUG ၏ အကြမ်းဖက်လုပ်ရပ်များကို မျက်ကွယ်ပြုခဲ့ကြောင်းနှင့် PDF များ၏ လုပ်ကြံတိုက်ခိုက်မှုကြောင့် ပြည်သူ ၃၄၈၃ ဦး သေဆုံးခဲ့ကြောင်း ဂျီနီဗာမြို့ရှိ မြန်မာအမြဲတမ်းကိုယ်စားလှယ်အဖွဲ့ရုံးက တုံပြန်ခဲ့ကြောင်း နိုင်ငံခြားရေးဝန်ကြီးဌာနက ထုတ်ပြန်ထားသည်။
ကုလသမဂ္ဂလူ့အခွင့်အရေးကောင်စီ၏ (၅၁)ကြိမ်မြောက်ပုံမှန်အစည်းအဝေးကာလအတွင်း ၂၁- ၉- ၂၀၂၂ ရက်တွင် လူ့အခွင့်အရေးကောင်စီသည် မြန်မာနိုင်ငံဆိုင်ရာ အထူးအစီရင်ခံစာတင်သွင်းသူ၏ နှုတ်ဖြင့်အစီရင်ခံတင်ပြမှုအပေါ် အပြန်အလှန် ဆွေးနွေးပွဲကို သက်ဆိုင်ရာနိုင်ငံမှ ပါဝင်ခြင်းမရှိဘဲ ထပ်မံပြုလုပ်ခဲ့သည်ကို စိတ်ပျက်ဖွယ် သိရှိခဲ့ရသည်။
အဆိုပါ အပြန်အလှန်ဆွေးနွေးမှုသည် ကုလသမဂ္ဂ လူ့အခွင့်အရေးကောင်စီ၏ (၅၁) ကြိမ် မြောက်ပုံမှန်အစည်းအဝေးကာလအတွင်း ကျင်းပပြုလုပ်ရန် စီစဉ် ထားသည့် မြန်မာနိုင်ငံကို သီးသန့် ပစ်မှတ်ထားသည့် အစီအစဉ်လေးခုအနက် ဒုတိယအစီအစဉ်ဖြစ်ကြောင်း သိရသည်။ အထူးကိုယ်စားလှယ်၏ နှုတ်ဖြင့် အစီရင်ခံတင်ပြမှုအပေါ် အပြန်အလှန်ဆွေးနွေးမှု အပါအဝင် အလွန်များပြားသည့် ယန္တရားများသည် သက်ဆိုင်ရာနိုင်ငံအတွက်သာမက ကောင်စီအတွက်ပါ အဆမတန် ဝန်ထုတ်ဝန်ပိုးများကို ဖြစ်ပေါ်စေပြီး အချိန်နှင့် အရင်းအမြစ် များပါ အလဟဿ ပြုန်းတီးစေကြောင်း မြန်မာနိုင်ငံက အကြိမ်ကြိမ်ထောက်ပြ ပြောကြားခဲ့ပြီး ဖြစ်သည်ဟု သိရသည်။
မြန်မာနိုင်ငံရှိ လူ့အခွင့်အရေး အခြေအနေဆိုင်ရာ အထူးအစီရင်ခံစာတင်သွင်းသူနှင့် လူ့အခွင့်အရေးကာကွယ်သူများ၏ အခြေအနေဆိုင်ရာ အထူးအစီရင်ခံစာ တင်သွင်းသူတို့၏ သတင်းထုတ်ပြန်ချက် တစ်ရပ်ကိုလည်း ၁၆-၉-၂၀၂၂ ရက်တွင် ထုတ်ပြန်ခဲ့ကြောင်း သိရှိရသည်။ ယင်း ထုတ်ပြန်ချက်တွင် ၎င်းတို့၏စွပ်စွဲချက်များကို အထောက်အထားဖြစ်စေသည့် တိကျသည့် အချက်အလက်တစ်စုံတစ်ရာ ပါဝင်ခြင်း မရှိဘဲ နိုင်ငံတကာ၏ အာရုံစိုက်မှုကို ရယူရန် ကုလသမဂ္ဂ လူ့အခွင့်အရေးကောင်စီ၏ (၅၁) ကြိမ်မြောက် ပုံမှန် အစည်းအဝေးနှင့်တိုက်ဆိုင်၍ သတင်း ထုတ်ပြန်ခဲ့ခြင်း ဖြစ်သည်။ တစ်ဖက်တွင် အထူး အစီရင်ခံစာတင်သွင်းသူ ကိုယ်တိုင်ကပင် မြန်မာနိုင်ငံအပေါ် တစ်ဖက်သတ် အရေးယူမှုများနှင့် ပိတ်ဆိုကန့်သတ်မှုများ ချမှတ်စေရန် အားပေးအားမြှောက်ပြုလျက် မြန်မာပြည်သူများ၏ စီးပွားရေးနှင့် လူမှုရေးဆိုင်ရာ အခွင့်အရေးများအပြင် ဖွံ့ဖြိုးတိုးတက်မှုဆိုင်ရာ အခွင့်အရေးများအပေါ် ချိုးဖောက်မှုများကို ထင်ရှားစွာ ကျူးလွန်လျက်ရှိကြောင်း ဖော်ပြထားသည်။
အထူးအစီရင်ခံစာတင်သွင်းသူသည် ၎င်း၏နှုတ်ဖြင့် အစီရင်ခံစာတင်သွင်းမှုအတွက် မိနစ်များစွာ အချိန်ယူ ပြောကြားခဲ့သော်လည်း ၎င်း၏ပြောကြားမှုတွင် မမှန်ကန်သော သတင်းရင်းမြစ်များမှ ရယူထားသည့် သတင်းတု၊ သတင်းမှားများကိုသာ ထည့်သွင်းပြောကြားခဲ့သည်ကို တွေ့ရသည်။ မြန်မာနိုင်ငံအစိုးရ (သိုမဟုတ်) ၎င်း၏ ယူဆချက်နှင့်မတူသည့် ရှုထောင့် မှ အမြင်နှင့် တုံပြန်ချက်များကို ပေါင်းစပ်ထည့်သွင်းဖော်ပြရန် ပျက်ကွက်ခဲ့သည်။ ထို့ပြင် အထူးကိုယ်စား လှယ်က “NUG” အမည်ခံ အကြမ်းဖက်အုပ်စုများကို အသိအမှတ်ပြုရန် နိုင်ငံတကာအသိုက်အဝန်းကို လူသိရှင်ကြား စည်းရုံးပေးလျက်ရှိသည်။ မြန်မာနိုင်ငံ၏ ကိုယ်စားပြုမှုနှင့် စပ်လျဉ်း၍ အဆုံးအဖြတ်ပေးရန် လုပ်ပိုင်ခွင့်မရှိကြောင်း ကုလသမဂ္ဂ၏ ရပ်တည်ချက်ကို အများကသိရှိသည့်တိုင် မြန်မာနိုင်ငံ၏ လက်ရှိအခြေအနေကို ထောက်ပြလျက် ဒေသတွင်းနှင့် နိုင်ငံတကာအဆင့်တွင် မြန်မာနိုင်ငံအပေါ် ဖိအားပေးရန် တစ်စိုက်မတ်မတ် အားထုတ်မှုများရှိသည်ကို တွေ့ရပြီး အခြေအနေ ၏နောက်ကွယ် အကြောင်းအရင်းမှန်အပေါ် ဂရုပြုခြင်းအလျဉ်းမရှိကြောင်းကိုလည်း တွေ့ရသည်ဟု ဆိုသည်။
မြန်မာအစိုးရက ၎င်း၏တာဝန်ဝတ္တရားများကို အစွမ်းကုန်ကြိုးပမ်းဆောင်ရွက် လျက်ရှိသည်။ သို့ရာတွင် ပြည်တွင်း၊ ပြည်ပတွင် အခြေစိုက်လျက်ရှိသည့် အကြမ်းဖက်သမားများနှင့် ၎င်းတို့ကို ထောက်ပံ့ကူညီလျက်ရှိသော လူပုဂ္ဂိုလ်၊ အဖွဲ့အစည်း များက မြန်မာနိုင်ငံတွင်ဒီမိုကရေစီရှင်သန်ရေးအစား မြန်မာနိုင်ငံအလုံးစုံ ပျက်သုဉ်းရေးကို ဦးတည်ဆောင် ရွက်လျက်ရှိသည်။ ထို့ကြောင့် မြန်မာအစိုးရအနေဖြင့် နိုင်ငံဖွံဖြိုးတိုးတက်မှုအတွက် အရေးပါသည့် ငြိမ်းချမ်းရေးနှင့် တည်ငြိမ်အေးချမ်းရေးအတွက် အလေးထားဆောင်ရွက်လျက်ရှိပြီး ၂၀၁၈ ခုနှစ်၊ ဒီဇင်ဘာလမှစတင်၍ လက်ရှိအချိန်အထိ တပ်မတော်မှ အပစ်အခတ် ရပ်စဲရေးထုတ်ပြန်ချက်စုစုပေါင်း ၂၁ ကြိမ် ထုတ်ပြန်ခဲ့သည်။ အစိုးရအနေဖြင့် စစ်မှန်၍ စည်းကမ်းပြည့်ဝသော ပါတီစုံဒီမိုကရေစီစနစ် ခိုင်မာအားကောင်းစေရန် နှင့် ပြည်ထောင်စု အခြေပြု ဒီမိုကရေစီနှင့် ဖက်ဒရယ်စနစ်တည်ထောင်ရေးအတွက် အင်အားပြည့် ကြိုးပမ်းဆောင်ရွက်လျက် ရှိကြောင်း တုံပြန်ချက်က ဆိုသည်။
အထူးကိုယ်စားလှယ်သည် “NUG” က ထောက်ပံ့ညွှန်ကြားလျက်ရှိသည့်“PDF” အမည်ခံ အကြမ်းဖက် အုပ်စုများက ကျူးလွန်ခဲ့သည့် ပြင်းထန်လွန်ကဲသော အကြမ်းဖက်မှုလုပ်ရပ်များကို မျက်ကွယ် ပြုခဲ့ပြီး ကျောင်းသူ/ သားများ၊ ဆရာများ၊ အစိုးရဝန်ထမ်းများနှင့် အခြားသော အပြစ်မဲ့ပြည်သူများ၏ လူ့အခွင့်အရေးများအပေါ် အန္တရာယ်ကျရောက်စေလျက်ရှိရာ ၁-၂-၂၀၂၂ ရက်မှ ၂၃-၇-၂၀၂၂ ရက် အထိ အကြမ်းဖက်အုပ်စုများထံမှ လက်နက် ၆,၃၁၁ လက်၊ ခဲယမ်းမီးကျောက်အမျိုးမျိုး ၃၃၅,၁၈၄ ခုနှင့် လက်ပစ်ဗုံး/ မိုင်းအမျိုးမျိုး ၁၁,၇၁၅ ခုတို့ သိမ်းဆည်းရမိခဲ့သည်။ ၁-၂-၂၀၂၂ ရက်မှ ၁၈ လတာ ကာလအတွင်း မီးရှို့တိုက်ခိုက်မှု၊ သတ်ဖြတ်မှုနှင့် ဗုံးခွဲတိုက်ခိုက်မှုတို့ အပါအဝင် အကြမ်းဖက်တိုက်ခိုက်မှု ၁၄,၉၀၇ ကြိမ် ဖြစ်ပွားခဲ့သည်။ ယင်းသို့ “NUG” နှင့် “PDF” အမည်ခံအကြမ်းဖက်အုပ်စုများ၏ တိုက်ခိုက်မှုများကြောင့် ပြည်သူ ၃,၄၈၃ ဦး သေဆုံးခဲ့ပြီး လူပေါင်း ၃,၀၆၅ ဦးဒဏ်ရာ ရရှိကာ ၄၁ ဦး ပျောက်ဆုံးလျက်ရှိကြောင်းလည်း တုံပြန်ထားသည်။
ထို့အတူ စစ်ကိုင်းတိုင်း၊ ဒီပဲယင်းမြို့နယ်၊ လက်ယက်ကုန်းရွာဖြစ်စဉ်နှင့်စပ်လျဉ်း၍ ၁၆-၉-၂၀၂၂ ရက်တွင် “PDF” အမည်ခံအကြမ်းဖက်သမားများနှင့် KIA လက်နက်ကိုင် အုပ်စုတို့ ပူးပေါင်း၍ လက်ယက်ကုန်းရွာရှိ လူနေအိမ်များနှင့် ဘုန်းကြီးကျောင်း အတွင်းနေရာယူ၍ ရွာသားများအား လူသားတံတိုင်းသဖွယ် အသုံးပြုအကာအကွယ်ယူကာ လုံခြုံရေး တပ်ဖွဲ့ဝင် များကို ပစ်ခိုက်တိုက်ခိုက်ခဲ့သည်။ ထိုသို့ “PDF” နှင့် KIA တို့၏ ခွဲခြားမှုမရှိသော တိုက်ခိုက်မှုများကြောင့် ရွာသားအချို့ ထိခိုက်မှုများရှိခဲ့ပြီး ဒဏ်ရာရရှိသူများကို ရေဦးဆေးရုံသို ပို့ဆောင်ပေးခဲ့သည်။ ၂၀-၉- ၂၀၂၂ ရက်တွင် ပြုလုပ်ခဲ့သည့် နိုင်ငံတော်စီမံအုပ်ချုပ်ရေးကောင်စီရုံး၊ သတင်းထုတ်ပြန်ရေးအဖွဲ့၏ သတင်းစာရှင်းလင်းပွဲတွင် အဆိုပါဖြစ်စဉ်နှင့် စပ်လျဉ်းသည့် အသေးစိတ် အချက်အလက်များကို ရှင်းလင်းပြောကြားခဲ့ပြီး ဒဏ်ရာရရှိခဲ့သည့် လက်ယက်ကုန်းရွာသား ၂ ဦးနှင့် အမေးအဖြေကို ထုတ်ပြန်ခဲ့သည်ဟုလည်း ဖော်ပြထားသည်။
အလားတူ မြန်မာ-ဘင်္ဂလားဒေ့ရှ်နှစ်နိုင်ငံနယ်နိမိတ်အနီး ဖြစ်စဉ်များနှင့်စပ်လျဉ်း၍ နိုင်ငံခြားရေးဝန်ကြီးဌာနက ၁၉-၉-၂၀၂၂ ရက်တွင် သတင်းထုတ်ပြန်ချက် တစ်ရပ် ထုတ်ပြန်ခဲ့သည်။ သတင်းထုတ်ပြန်ချက်တွင် ၁၆-၉-၂၀၂၂ ရက်တွင် AA နှင့် ARSA အကြမ်းဖက်အုပ်စုများသည် BP-31 ရှိ တောင်ပြို (ယာ) နယ်စပ်လုံခြုံရေးရဲကင်းစခန်းအား မော်တာကျည်များဖြင့် ပစ်ခတ်တိုက်ခိုက်ခဲ့ရာ မော်တာကျည် ၃ လုံးသည် ဘင်္ဂလားဒေ့ရှ်နိုင်ငံဘက်ခြမ်းသို့ ကျရောက်ခဲ့ကြောင်း၊ အလားတူ ၁၆-၉-၂၀၂၂ ရက် နှင့် ၁၇-၉-၂၀၂၂ ရက်တို့တွင် အကြမ်းဖက်အဖွဲ့များမှ BP-34 ရှိ တောင်ပြို (ဝဲ) နယ်စပ်လုံခြုံရေးရဲကင်းစခန်းအား အမျိုးအစားတူကျည်များဖြင့် ထပ်မံတိုက်ခိုက်ခဲ့ရာ မော်တာကျည် ၉ လုံး ဘင်္ဂလားဒေ့ရှ် နိုင်ငံဘက်ခြမ်းသို ကျရောက်ခဲ့ကြောင်း၊ AA နှင့် ARSA အကြမ်းဖက်အုပ်စုများ၏ တိုက်ခိုက်မှုများသည် မြန်မာ – ဘင်္ဂလားဒေ့ရှ် နှစ်နိုင်ငံအကြား ချစ်ကြည်ရေးကို ပျက်ပြားစေရန် ရည်ရွယ်ချက်ရှိရှိဖြင့် လုပ်ဆောင်ခဲ့ခြင်းဖြစ်သည်။
အထူးအစီရင်ခံတင်သွင်းသူ၏ နှုတ်ဖြင့်အစီရင်ခံတင်ပြမှုသည် ဘက်မလိုက်မှု၊ ဓမ္မဓိဋ္ဌာန်ကျမှုနှင့် ပညာရှင်ဆန်မှုစသည့် အခြေခံမူများနှင့် သွေဖီလျက်ရှိသည်မှာ ထင်ရှားသည်။ လူ့အခွင့်အရေးကောင်စီနှင့် ၎င်း၏ယန္တရားများသည် နိုင်ငံရေး သက်ဝင်မှု ပိုမိုများလာပြီး ထိပ်တိုက်တွေ့ဆုံမှုသို ဦးတည်လျက်ရှိသည်ကို တွေ့နိုင်သည်။ ထိုကြောင့် အထူးအစီရင်ခံစာတင်သွင်းသူအနေဖြင့် အထူးအစီရင်ခံစာ တင်သွင်းသူများ လိုက်နာရမည့် ကျင့်ဝတ်စည်းကမ်းများနှင့် လူ့အခွင့်အရေးကောင်စီ ၏ အခြေခံမူများနှင့်အညီ လိုက်နာဆောင်ရွက်သင့်သည်ဟု သတိပေးထားသည်။
ထို့ပြင် မြန်မာနိုင်ငံအနေဖြင့် လူ့အခွင့်အရေးကိစ္စရပ်များကို နိုင်ငံရေးသွတ်သွင်းမှုများ သို့မဟုတ် လူ့အခွင့်အရေးကို အခြားနိုင်ငံများ ၏ ပြည်တွင်းရေးကို ဝင်ရောက်စွက်ဖက်ရန် နိုင်ငံရေးလက်နက်တစ်ခုအဖြစ် အသုံးချခြင်းတိုကို အခိုင်အမာ ဆန့်ကျင်ပြီး မြန်မာနိုင်ငံအနေဖြင့် ပြည်တွင်းရေး၊ တရားစီရင်ရေး၊ ဥပဒေပြုရေး၊ အုပ်ချုပ်ရေး အာဏာနှင့် နိုင်ငံ၏အချုပ်အခြာအာဏာပိုင်စိုးမှုအပေါ် မည်သို့သော ဝင်ရောက်စွက်ဖက်မှုမျိုးကိုမဆို ဆက်လက် ကာကွယ်သွားမည်ဖြစ်သည်။ အထက်ပါ အကြောင်းအချက်များကြောင့် အထူးအစီရင်ခံစာတင်သွင်းသူ၏ ဘက်လိုက်မှု မကင်းသောနှုတ်ဖြင့်အစီရင်ခံစာတင်သွင်းမှုသည် မြန်မာနိုင်ငံ၏ အခြေအနေကို ဖြစ်ရပ်မှန်မှ များစွာကွဲလွဲလျက် ကောင်စီအဖွဲ့ဝင်များအကြား အထင်အမြင် လွဲမှားမှုများကို ဖြစ်စေခဲ့သည်ဟု ဂျီနီဗာမြို့ရှိ မြန်မာအမြဲတမ်ကိုယ်စားလှယ် အဖွဲ့ရုံးက တုံပြန်ခဲ့ကြောင်း နိုင်ငံခြားရေးဝန်ကြီးဌာန၏ ထုတ်ပြန်ချက်တွင် ဖော်ပြထားသည်။
