၂၂. ၂. ၂၀၂၄
Written by Hey Mar
ရန်ကုန်တိုင်းဒေသကြီး သန်လျင်မြို့နယ်၊ ဒဂုံ- သီလဝါကားလမ်း၊ ကုလားဝဲကျေးရွာအနီး၊ ကုလားဝဲတံတားအဆင်းမှာ သုံးဘီးဆိုင်ကယ်ကို တိမ်းရှောင်လိုက်တဲ့ ဆီဘောက်ဆာကား လမ်းဘေးထိုးကျ တိမ်းမှောက်မှု ဒီနေ့ ဖေဖော်ဝါရီ ၂၂ ရက် နေ့လည် ၁၂ နာရီကျော်အချိန်က ဖြစ်ပွားခဲ့တယ်လို့ မြေပြင်အကူအညီ ရောက်ရှိခဲ့တဲ့ အကြင်နာကုသိုလ်ပြု လူမှုကူညီရေး အသင်းထံကနေ သိရပါတယ်။
ဖြစ်စဥ်အတွင်း လူသေဆုံးမှုမရှိခဲ့ပေမယ့် သုံးဘီးဆိုင်ကယ်မောင်းနှင်သူကတော့ အနီရောင်အဆင့် ဒဏ်ရာတွေရရှိခဲ့တာကြောင့် သန်လျင်ဆေးရုံကို ပို့ဆောင်ပေးရတယ်လို့ သိရပါတယ်။
“ဘောက်ဆာကားက တုံးလုံးလဲသွားတာ။ ဘောက်ဆာပေါ်က နှစ်ဦးစလုံးကအန္တရာယ်ကင်းပါတယ်။ ပွန်းပဲ့ ဖူးယောင်ဒဏ်ရာလောက်ပဲ ရတယ်။ အခြေအနေဆိုးတာက ဆိုက်တွဲမောင်းသူပါ။ ဆီဘောက်ဆာကားက ဆီအပြည့် တင်လာတာမို့ လောင်ကျွမ်းပေါက်ကွဲမှာ စိုးရိမ်ရလို့ မီးသတ်တပ်ဖွဲ့ဆီအကြောင်းကြားတာတွေ ကူညီဆောင်ရွက်ပေးခဲ့ပါတယ်” လို့ အကြင်နာကုသိုလ်ပြု လူမှုကူညီရေးအသင်းက MT News ကို ပြောပါတယ်။
