၂၂. ၂. ၂၀၂၄
Written by Min Mahar
ရုံးအတွင်း အစည်းအဝေးလုပ်နေသော ကျေးရွာအုပ်ချုပ်ရေးမှူးကို PDF များက ဝင်ရောက်ပစ်ခတ်သတ်ဖြတ်သွားမှု ရွှေကျင်မြို့နယ်တွင် ယမန်နေ့ မွန်းလွဲပိုင်းက ဖြစ်ပွားခဲ့ကြောင်း ဒေသခံများထံမှ သိရသည်။
ဖြစ်စဉ်မှာ ယမန်နေ့ (ဖေဖော်ဝါရီ ၂၁ ရက်) မွန်းလွဲ ၁ နာရီ ၁၅ မိနစ်ခန့်က ပဲခူးတိုင်းဒေသကြီး၊ ရွှေကျင်မြို့နယ်၊ ခြေတော်ရာကျေးရွာတွင် နေထိုင်သော အသက် ၄၅ နှစ်အရွယ်ခန့်ရှိသည့် ကျေးရွာအုပ်ချုပ်ရေးမှူး ဦးမျိုးကြည်သည် ရပ်ကွက်အုပ်ချုပ်ရေးမှူးရုံးအတွင်း၌ ရပ်ရွာအကျိုးအတွက် အစည်းအဝေးပြုလုပ်နေစဉ် PDF များရောက်လာပြီး သေနတ်ဖြင့် ၅ ချက်ခန့်ပစ်ခတ်သွားသည့်အတွက် အုပ်ချုပ်ရေးမှူးသည် ဦးခေါင်း၊ မျက်နှာ၊ ယာဘက်ရင်အုံနှင့် ယာဘက်လက်တို့ကို ကျည်များထိမှန်ကာ ဖြစ်စဉ်ဖြစ်ပွားရာနေရာမှာပင် ပွဲချင်းပြီး သေဆုံးသွားကြောင်း သိရသည်။
“အစည်းအဝေးလုပ်နေတဲ့ အုပ်ကြီးကို သေနတ်ကိုယ်စီကိုင်ထားတဲ့ အမည်မသိ PDF တွေ ရောက်လာပြီး အစည်းအဝေးလုပ်နေတဲ့ အဲ့ဒီရုံးခန်းထဲမှာပဲ သေနတ်နဲ့ ဝင်ပစ်သတ်သွားတာ။ လေးငါးခြောက်ယောက်လောက်ရှိမယ် ဆိုင်ကယ်သုံးစီးနဲ့ရောက်လာကြတာ။ ဒီနယ်ကမဟုတ်တဲ့ မျိုးကြည် အုပ်ကြီးလုပ်ချင်ဦးကွာ လို့ပြောပြီ သတ်သွားတာပဲ”ဟု ရွာခံတစ်ဦးက ဆိုသည်။
