ရွှေလင်ဗန်းစက်မှုဇုန်ရှိ မိုးပြည့်လျှံဟိန်း အထည်ချုပ်စက်ရုံမီးလောင်မှု လျှပ်စစ်ပန်ကာအပူလွန်ကဲရာမှ မီးလောင်ဟု စစ်ဆေးတွေ့ရှိ

၂၁.၂.၂၀၂၄
Written by KL

ရန်ကုန်တိုင်းဒေသကြီး၊ လှိုင်သာယာ(အနောက်ပိုင်း) မြို့နယ်၊ ရွှေလင်ဗန်းစက်မှုဇုန် သံချပ်ဝန် ဦးမြူလမ်းရှိ “မိုးပြည့်လျှံဟိန်း” အထည်ချုပ်စက်ရုံတွင် ဖေ​ဖော်ဝါရီ ၂၀ ရက် ညနေပိုင်းက ​ဖြစ်ပွားခဲ့သော မီးလောင်မှုမှာ လူမရှိဘဲ လျှပ်စစ်ပန်ကာဖွင့်ထားခဲ့ရာမှ အပူလွန်ကဲ၍ မီးလောင်ခဲ့ခြင်းဖြစ်ကြောင်း စစ်ဆေးသူများ၏ အတည်ပြုချက်အရ သိရသည်။

ထိုဖြစ်စဥ်တွင် အလျား ပေ ၅၀၊ အနံ ပေ ၅၀ ရှိ ၃ ထပ်အဆောက်အအုံအထည်ချုပ်စက်ရုံရှိ အပေါ်ဆုံးထပ်တွင် စတင်လောင်ကျွမ်းခဲ့ခြင်းဖြစ်ပြီး မိနစ် ၃၀ နီးပါးလောင် ကျွမ်းခဲ့ခြင်းဖြစ်သည်။

မီးလောင်မှုကြောင့် အထည်ချုပ်စက်ရုံ၏ အပေါ်ဆုံးထပ် မီးလောင်ဆုံးရှုံးခဲ့ပြီး အသုံးပြု၍မရတော့သော အထည် ၅၀၀ ခန့်လည်း မီးလောင်ဆုံးရှုံးခဲ့သည်။

မီးလောင်မှုကို မီးငြှိမ်းသတ်ယာဥ် ၈ စီး၊ အထောက်အကူပြုယာဥ် ၁ စီး၊ ကွပ်ကဲမှုယာဥ် ၁ စီးနှင့် မီးသတ်တပ်ဖွဲ့ဝင် ၁၁၀ ကျော်ဖြင့် ငြှိမ်းသတ်ခဲ့ရသည်။

မီးလောင်မှုကြောင့် မန်နေဂျာဖြစ်သော အသက် ၅၃ နှစ်အရွယ် အမျိုးသမီးကြီးကို ပုဒ်မ ၂၈၅ ဖြင့် လှိုင်သာယာ (အနောက်ပိုင်း)မြို့မရဲစခန်းက အမှုဖွင့်ထားသည်။