၁၈.၂.၂၀၂၄
Written by KL
ရန်ကုန်တိုင်းဒေသကြီး၊ ဒဂုံမြို့သစ်(တောင်ပိုင်း)မြို့နယ်တွင် ဖေဖော်ဝါရီ ၁၇ ရက်က တစ်ရက်အတွင်း မီးလောင်ကျွမ်းမှုနှစ်ကြိမ်ဖြစ်ပွားခဲ့ကြောင်း သိရသည်။
ဖြစ်စဥ်များတွင် ဖေဖော်ဝါရီ ၁၇ ရက် နံနက် ၁၀ နာရီ ၂၅ မိနစ်ခန့်က ဒဂုံမြို့သစ်(တောင်ပိုင်း)မြို့နယ်၊ အမှတ်(၂၀)ရပ်ကွက် မြိတ်လမ်းရှိ အလျား ပေ ၂၀၊ အနံ ပေ ၆၀ ရှိ သွပ်မိုး၊ သွပ်ကာ၊ ကွန်ကရစ်ခင်း ၁ ထပ်နေအိမ်တွင် ဝရိန်ဆော်ရာမှ အနီးတွင်ရှိသော ဓာတ်ဆီပုံးသို့ မီးပွားကျ၍ မီးကူးစက်လောင်ကျွမ်းခဲ့ရာ အဆောက်အဦ ၂ လုံး မီးလောင်ဆုံးရှုံးခဲ့သည်။
အလားတူ ဖေဖော်ဝါရီ ၁၇ ရက် မွန်းလွဲ ၁ နာရီ ၇ မိနစ်ခန့်က ဒဂုံမြို့သစ်(တောင်ပိုင်း)မြို့နယ်၊ အမှတ်(၅၄)ရပ်ကွက်၊ ဇွဲကပင်လမ်းရှိ အလျား ပေ ၂၀၊ အနံ ပေ ၆၀ရှိ သွပ်မိုး၊ အုတ်ကာ၊ကွန်ကရစ်ခင်း ၂ ထပ်နေအိမ်တွင် ဘုရားစင်ပေါ် သွယ်တန်းထားသော ဝါယာကြိုးများ အပူလွန်ကဲရာမှ မီးပွားထွက်၍ အနီးရှိ အဝတ်အစားများသို့ မီးကူးစက်လောင်ကျွမ်းခဲ့ရာ နေအိမ်နှင့် အတွင်းပစ္စည်းများ မီးလောင်ဆုံးရှုံးခဲ့ကြောင်း သိရသည်။
အဆိုပါ မီးလောင်မှု ၂ ခုနှင့် ပတ်သက်၍ အသက် (၃၈)နှစ်အရွယ် အမျိုးသားနှင့် အသက်(၅၀)နှစ်အရွယ် အမျိုးသားတို့ကို ဒဂုံမြို့သစ်(တောင်ပိုင်း)မြို့မရဲစခန်းမှ ပုဒ်မ ၂၈၅ ဖြင့် အမှုဖွင့်ထားကြောင်း သိရသည်။
