၁၆.၂.၂၀၂၄
Written by KL
ဧရာဝတီ တိုင်းဒေသကြီး၊ ဖျာပုံမြို့နယ်၊ ဖိုးစွာကျေးရွာအနီး ဖျာပုံ -ကျိုက်လတ် ကားလမ်း မိုင်တိုင်အမှတ် ၄၈/၄၉ ကြားတွင် ယနေ့ (ဖေဖော်ဝါရီ ၁၆ ရက်) နံနက် ၁၀ နာရီခန့်က သီဟနိုင်ခရီးသည်တင်ယာဥ်မှာ ဆိုင်ကယ်ကို ရှောင်တိမ်းရာက လမ်းဘေးမြောင်းထဲသို့ ထိုးကျတိမ်းမှောက်ခဲ့သဖြင့်လမ်းလျှောက်လာသူ တစ်ဦးသေဆုံးပြီး ယာဥ်ပေါ်ပါ ခရီးသည် ၈ ဦး ထိခိုက်ဒဏ်ရာရရှိခဲ့ကြောင်း ဧရာဝတီတိုင်းဒေသကြီး မီးသတ်ဦးစီးဌာနထံမှ သိရသည်။
ဖြစ်စဥ်မှာ အသက် ၄၇နှစ်အရွယ် ယာဥ်မောင်း ဦးကျော်ထွေးခိုင်မောင်းနှင်လာပြီး ခရီးသည် ၃၀ ဦး၊ ယာဥ်နောက်လိုက်တစ်ဦး လိုက်ပါလာကာ ဖျာပုံမြို့မှ ကျိုက်လတ်မြို့သို့ထွက်ခွာလာသော သီဟနိုင် ခရီးသည်တင်ယာဥ်တစ်စီးမှာ ဖျာပုံမြို့နယ်၊ ဖိုးစွာရွာအနီးတွင် မျက်နှာချင်းဆိုင်မောင်းနှင်လာသော မော်တော်ဆိုင်ကယ်အား ရှောင်တိမ်းရာ အရှိန်မထိန်းနိုင်ဘဲ လမ်းလျှောက်နေသူဦးကျော်ထွန်းကို ဝင်တိုက်ပြီး ဘေးမြောင်းထဲသို့ ထိုးကျတိမ်းမှောက်ခဲ့ခြင်းဖြစ်သည်။
ယာဥ်မတော်တဆမှုကြောင့် လမ်းလျှောက်လာသူ အမျိုးသားမှာသေဆုံးခဲ့ပြီး ဒဏ်ရာရရှိသူများကို ပဲ့တင်သံ လူမှုကူညီရေးအသင်းမှ သူနာတင်ယာဥ်(၁)စီး၊ မေတ္တာရှင်လူမှုကူညီရေးအသင်းမှ သူနာတင်ယာဥ်(၁)စီး၊ ဖျာပုံမြို့နယ်မီးသတ်ဦးစီးမှူးရုံးမှ သူနာတင်ယာဥ်(၁)ဦးတို့ဖြင့် ဖျာပုံပြည်သူ့ဆေးရုံသို့ ပို့ဆောင်ပေးခဲ့ကြသည်။
ယာဥ်မတော်တဆမှုဖြစ်စဥ်ကို ဒေသခံ လူမှုကူညီရေးအသင်းတို့နှင့် ဖျာပုံမြို့နယ် မီးသတ်ဦးစီးမှူးရုံးမှ တပ်ဖွဲ့ဝင် ၁၀ ဦး၊အရန် ၅ ဦးတို့ဖြင့် ကယ်ဆယ်ရေးလုပ်ငန်းများ ဆောင်ရွက်ခဲ့ကြောင်း သိရသည်။
