၈. ၂. ၂၀၂၄
Written by Ye Kyaw
ရန်ကုန်တိုင်းဒေသကြီး ရွှေလုပ်ငန်းရှင်များအသင်း (YGEA)၏ အလုပ်အမှုဆောင်များသည် ဆယ်တန်းသာအောင်ပြီး အင်္ဂလိပ်စကားနားလည်သူတစ်ဦးမှမပါဟု လူမှုကွန်ရက်ပေါ်တွင်ရေးသားသူကို တရားစွဲဆိုသွားမည်ဖြစ်ကြောင်း ရန်ကုန် တိုင်းဒေသကြီး ရွှေလုပ်ငန်းရှင်များအသင်းမှ ယနေ့တွင် သတင်းထုတ်ပြန်ထားသည်။
“အသင်းဂုဏ်သိက္ခာ၊ အသင်းဝင်များ၏ ဂုဏ်သိက္ခာကျဆင်းစေရန် ဆောင်ရွက်မှုများအား တရားလွှတ်တော်ရှေနေများမှတစ်ဆင့် အွန်လိုင်းဥပဒေအရ အသင်းမှပြင်းပြင်းထန်ထန် အရေးယူဆောင်ရွက်သွားမည်ဖြစ်ကြောင်း သတိပေးအပ်သည်။” ဟု YGEA ၏ လူမှုကွန်ရက်စာမျက်နှာမှတစ်ဆင့် အသိပေးထုတ်ပြန်ထားသည်။
Gold အမည်ဖြင့် ဖွင့်လှစ်ထားသည့် Facebook Group တစ်ခုတွင် ရွှေပွဲစားကြီး အမည်ဖြင့် Facebook အကောင့်ဖွင့်ထားသူက ရန်ကုန်တိုင်းဒေသကြီးရွှေလုပ်ငန်းရှင်များအသင်း (YGEA) ၏ အစည်းအဝေးကျင်းပနေသော ဓာတ်ပုံနှစ်ပုံကို အသုံး ပြုကာ “ပညာအရည်ချင်း ၁၀ တန်းအောင်သာရှိသော YGEA အလုပ်အမှုဆောင်များ၊ အင်္ဂလိပ်ဘာသာစကား နားလည်သူ တစ်ဦးမှ မပါရှိပါကြောင်း” ဟု ရေးသားခဲ့မှုအပေါ် YEGA က တရားစွဲဆိုသွားရန် အထက်ပါအတိုင်း ထုတ်ပြန်ထားခြင်းဖြစ်သည်။
အဆိုပါ ဖြစ်စဉ်နှင့် ပတ်သက်ပြီး MT News သတင်းဌာနအနေဖြင့် ရန်ကုန်တိုင်းဒေသကြီး ရွှေလုပ်ငန်းရှင်များအသင်း (YGEA) သို့ ဆက်သွယ်မေးမြန်းခဲ့ရာတွင် “လောလောဆယ်တော့ အဲဒါနဲ့ ပတ်သက်လို့ ဘာမှ ဖြေဆိုခွင့်မရှိသေးပါဘူး။ ဒါကို နောက်မှာ သတင်း ထုတ်ပြန်ပေးပါ့မယ်” ဟု YGEA ၏ အတွင်းရေးမှူး ဦးဝင်းမြင့်က ပြန်လည်ဖြေကြားခဲ့သည်။
