“ချစ်သူသာပန်းတစ်ပွင့်ဖြစ်ခဲ့လျှင်” ရုပ်ရှင်ဇာတ်ကားကြီး Red Carpet Show ကျင်းပ

၃၀.၁.၂၀၂၄
Written By Thandar

Taurus V ထုတ်လုပ်ရေးကထုတ်လုပ်တဲ့ အချစ်ဒရာမာဇာတ်လမ်းပုံစံ “ချစ်သူသာပန်းတစ်ပွင့်ဖြစ်ခဲ့လျှင်” ရုပ်ရှင်ဇာတ်ကားကြီး Red Carpet Show ကို ယနေ့ ဇန်နဝါရီ ၃၀ ရက် ညနေပိုင်းက ရန်ကုန်မြို့ သမ္မတအဆင့်မြင့် ရုပ်ရှင်ရုံမှာ ကျင်းပခဲ့ပါတယ်။

“ဒီဇာတ်ကားကို လွန်ခဲ့တဲ့ ၆ နှစ်လောက်က ရိုက်ကူးခဲ့တာပါ။ စနဲ့သ အသံစကားလုံးတွေ မကွဲသလိုလေး သရုပ်ဆောင်ထားပါတယ်။ တကယ်လည်း ဇာတ်ကားရိုက်နေရင်းနဲ့ ကိုမင်းဦးက အရယ်သန်။ တော်တော်လေးကို ရယ်နေရတယ်။ ဇာတ်ကားတစ်ကားလုံးရဲ့ ၈၀ ရာခိုင်နှုန်းက ရေထဲမှာပါပဲ။ အင်းလေးရဲ့ သဘာဝအလှစစ်တွေကို မြင်တွေ့ရမှာဖြစ်တယ်။ နေမွန် (ခ)စိုင်းစိုင်း နဲ့ မြလေးရှင်(ခ)ကစ်ကစ်တို့အကြောင်းပြောပြတဲ့ ချစ်စရာကောင်း အမူအယာလေးတွေ မြင်ရမှာပါ”လို့ သရုပ်ဆောင် အကယ်ဒမီ ခင်ဇာခြည်ကျော်က ပြောပါတယ်။

ဒီဇာတ်ကားမှာ သရုပ်ဆောင် အကယ်ဒမီ စိုင်းစိုင်းခမ်းလှိုင်၊ အကယ်ဒမီ ၀တ်မှုန်ရွှေရည်၊ အကယ်ဒမီ မင်းဦး၊ မင်းသူ၊အကယ်ဒမီ ခင်ဇာခြည်ကျော်၊ အကယ်ဒမီ ခင်မို့မို့အေး၊ ထူးခြား၊ ဆင်မ၊ ဇော်မှိုင်း၊ ကျော်ထက်၊ ဈူးဈူးဈာန်၊ ဂရိတ်ချမ်း စတဲ့သူတွေ ပါဝင်ထားကြပါတယ်။

“ချစ်သူသာပန်းတစ်ပွင့်ဖြစ်ခဲ့လျှင်” ရုပ်ရှင်ဇာတ်ကားကို လာမယ့် ဖေဖော်ဝါရီ ၂ ရက်နေ့ကစတင်ပြီး မြန်မာတစ်ပြည်လုံးမှာ ရုံတင်ပြသမှာဖြစ်ပါတယ်။