၃၀. ၁. ၂၀၂၄
Written by Nay Moe
ရှမ်းပြည်နယ်မြောက်ပိုင်း၊ လားရှိုးမြို့လယ် အမှတ် ၃ ရပ်ကွက် သီရိလမ်းနဲ့ ကြာနီလမ်းထောင့်က RD ကုန်မာဆိုင်ရှေ့မှာ ဒီနေ့ မွန်းလွဲ ၂ နာရီခန့်အချိန်က ဗုံးနှစ်လုံးဆင့် ပေါက်ကွဲမှု ဖြစ်ပွားတယ်လို့ ဒေသခံပြည်သူတွေဆီက ကနဦးသတင်းအရ သိရပါတယ်။
ဒီဖြစ်စဥ်က ဆိုင်ကယ်မှာ ဗုံးထောင်သွားတဲ့ဖြစ်စဥ်လို့လည်း ပြောကြပြီး ပေါက်ကွဲမှုအရှိန်ပြင်းတာကြောင့် ဆိုင်ကယ် သုံးစီးထက်မနည်းပျက်စီးခဲ့သလို ပေါက်ကွဲအပြီးမှာလည်း မီးလောင်မှုဖြစ်ပွားခဲ့တာကြောင့် RD ကုန်မာဆိုင်က ဝန်ထမ်းတွေနဲ့ အနီးဝန်းကျင်ပြည်သူတွေက ရေဖြန်းပြီး ငြှိမ်းသတ်ခဲ့ရတယ်လို့လည်း သိရပါတယ်။
“ဆိုင်ကယ်နှစ်စီးပေါ်မှာ ဗုံးထောင်ထားတာ။ ပေါက်ကွဲသံကလည်းကျယ်သလို ဆိုင်ရှေ့ရပ်ထားတဲ့ဆိုင်ကယ်တွေလည်း ပျက်စီးကုန်တယ်။ ဗုံးထောင်ခံရတဲ့ဆိုင်ကယ်တွေက တစ်စစီ ပေါက်ကွဲပြီးတော့ မီးလောင်လို့ ဝိုင်းငြှိမ်းကြရတယ်။ လူထိခိုက်တာတော့မရှိဘူး” လို့ ဒေသခံတစ်ဦးက ပြောပါတယ်။
လက်ရှိမှာတော့ လုံခြုံရေးတပ်ဖွဲ့ဝင်တွေက ဒီပေါက်ကွဲမှုဖြစ်စဥ်ကို စိစစ်နေသလို ပေါက်ကွဲမှုကြောင့်ထိတ်လန့်အမောဖောက်ပြီးဆေးရုံတင်ပို့ရသူလည်းရှိတယ်လို့ ကနဦးသိရပြီး ဖြစ်စဥ်အသေးစိတ်ကို MT News က ဆက်လက်စုံစမ်းနေပါတယ်။ (Photo – CJ)
