၂၀. ၁. ၂၀၂၄
translated by Htwe Ko Tun
မြောက်ကိုရီးယားက ဇန်နဝါရီ ၃၀ ရက် နံနက်ပိုင်းတွင် အနောက်ဘက်ကမ်းရိုးတန်း ပင်လယ်ပြင်အတွင်းသို့ အမျိုးအမည်ခွဲခြားမရသော ခရုစ်ဒုံးကျည်အများအပြားကို ပစ်လွှတ်ခဲ့ကြောင်း၊ မြောက်ကိုရီးယားအနေဖြင့် တစ်ပတ်အတွင်း ခရုစ်ဒုံးကျည်များ စမ်းသပ်ပစ်လွှတ်မှု သုံးကြိမ်မြောက်ပြုလုပ်ခြင်းဖြစ်ကြောင်း တောင်ကိုရီးယားစစ်ဖက်ကပြောခဲ့သည်။
တောင်ကိုရီးယားနိုင်ငံ စစ်ဦးစီးချုပ်များ ကြေညာချက်တွင် ဒေသစံတော်ချိန် ဇန်နဝါရီ ၃၀ ရက် နံနက် ၇ နာရီ (ဂရင်းနစ်စံတော်ချိန် ဇန်နဝါရီ ၂၉ ရက် ည ၁၀ နာရီ) တွင် မြောက်ကိုရီးယားက ဒုံးကျည်များပစ်လွှတ်ခဲ့ခြင်းဟု ဆိုခဲ့သည်။ တောင်ကိုရီးယားနှင့် အမေရိကန် ထောက်လှမ်းရေးအာဏာပိုင်များက အခြေအနေကို အနီးကပ် စောင့်ကြည့်နေကြကြောင်းကြေညာချက်တွင် ဖော်ပြခဲ့သည်။
ကိုရီးယားကျွန်းဆွယ်အတွင်း တင်းမာမှုများမြင့်တက်နေချိန်တွင် ဤကဲ့သို့ ဒုံးကျည်ပစ်လွှတ်မှုများကို မြောက်ကိုရီးယားက ပြုလုပ်ခဲ့ခြင်းဖြစ်ပြီး ဇန်နဝါရီ ၂၈ ရက်က ၎င်း၏အရှေ့ဘက်ကမ်းရိုးတန်းပင်လယ်အတွင်းသို့ ဒုံးကျည်ပစ်လွှတ်မှုများအပြီး ထပ်မံပြုလုပ်ခြင်းလည်းဖြစ်သည်။
မြောက်ကိုရီးယားနိုင်ငံပိုင် သတင်းဌာန KCNA က နိုင်ငံအနေဖြင့် မဟာဗျူဟာမြောက် ခရုစ်ဒုံးကျည်အသစ်များကို ထပ်မံစမ်းသပ်နေကြောင်း လွန်ခဲ့သည့်အပတ်က သတင်းဖော်ပြခဲ့သည်။
Ref- CNA
