၃၀. ၁၁. ၂၀၂၂
Written by Nay Moe
တောင်ဒဂုံမြို့နယ်အား အခြေပြုကာ လုပ်ကြံတိုက်ခိုက်မှုများ ပြုလုပ်နေသည့် ဒဂုံတောင်မြို့ပြပြောက်ကျား တပ်ဖွဲ့ (S.D.G.F)ဝင်များ အောက်တိုဘာနှင့် နိုဝင်ဘာ နှစ်လအတွင်း ဖမ်းဆီးခံလိုက်ရပြီး ကျန်သူများ မြို့ပြမှ တိမ်းရှောင်နေရကာ တော်လှန်ရေးတွင် ကျရာနေရာမှ ဆက်လက်ပါဝင်မည်ဟု ယနေ့ညတွင် ကြေညာသည်။
၂၀၂၂ ခုနှစ်၊ အောက်တိုဘာနှင့်နိုဝင်ဘာလအတွင်း ဒဂုံတောင်မြို့ပြပျောက်ကြားတပ်ဖွဲ့ (S.D.G.F) အဖွဲ့ဝင်ရဲဘော်များအား ဖမ်းဆီး၊ထိန်းသိမ်းခြင်းခံခဲ့ရပြီး S.D.G.Fတပ်ဖွဲ့၏ မြေပြင်တာဝန်ခံအပါအဝင် အဖွဲ့ဝင်ရဲဘော်များအား ရန်သူမှ အလစ်အငိုက်ဖမ်းဆီးထိန်းသိမ်းခြင်း ခံခဲ့ရသည်။ မြေပြင်တာဝန်ခံအား ဖမ်းဆီးထိန်းသိမ်းခံရသည့်အချိန်မှ ယနေ့အထိ သတင်းအဆက်အသွယ်တစ်စုံတစ်ရာ မရသောကြောင့်စိုးရိမ်ရသည့်အခြေအနေတစ်ခုတွင်ရှိသည်ဟုလည်း ဆိုသည်။
လက်ရှိတွင် ကျန်ရှိသော အဖွဲ့ဝင်များသည်လည်း လွတ်မြောက်ဘေးကင်းရာ နေရာအသီးသီးသို့ တိမ်းရှောင် ရောက်ရှိသွားပြီး ကျရာနေရာမှဆက်လက်ပါဝင်တော်လှန်သွားမည်ဖြစ်သည်ဟု ဆိုသည်။
S.D.G.F အဖွဲ့သည် ရန်ကုန်မြို့ပြတွင် လုပ်ကြံသတ်ဖြတ်မှုများနှင့် ဗုံးခွဲမှုများ မကြာခဏလုပ်ဆောင်နေသည့်အဖွဲ့ဖြစ်ပြီး ပြီးခဲ့သည့် မေလ ၆ ရက်က တောင်ဒဂုံမြို့နယ် ၂၅ ရပ်ကွက် အုပ်ချုပ်ရေးမှူး၏ သားဖြစ်သူနှင့် မြေးဖြစ်သူကို သေနတ်ဖြင့် ဆယ်ချက်ပစ်၍ သတ်ဖြတ်ခြင်း၊ ဩဂုတ် ၁ ရက်တွင် တောင်ဒဂုံ ၂၅ ရပ်ကွက်ရာအိမ်မှူးအား သတ်ဖြတ်ခြင်း၊ စက်တင်ဘာ ၂၉ ရက်တွင် ရာအိမ်မှူးတစ်ဦးနှင့် အမျိုးသမီးတစ်ဦးအား သတ်ဖြတ်ခြင်းများအပါအဝင် လုပ်ကြံသတ်ဖြတ်မှုများနှင့် ဗုံးခွဲမှုအများအပြားပြုလုပ်ထားသည့် အဖွဲ့ဖြစ်သည်။
