၂၃. ၁. ၂၀၂၄
Written by KL
ပဲခူးတိုင်းဒေသကြီး၊ ပြည်မြို့၊ ခတ္တရာမြို့သစ်နယ်မြေ၊အောင်ရတနာရပ်ကွက်တွင် ဇန်နဝါရီ ၂၂ ရက် ည ၈ နာရီခွဲခန့်က ရာအိမ်မှူးတစ်ဦး ဓားခုတ်ခံရ၍ ဓားဒဏ်ရာများစွာဖြင့် သေဆုံးခဲ့ကြောင်း ဒေသခံများထံမှ သိရသည်။
သေဆုံးသူမှာ အသက် ၇၀ အရွယ်ရှိပြီး မျက်နှာ၊နှုတ်ခမ်း၊ ရင်ဘတ်၊ ဝမ်းဗိုက်ဘေး၊ လက်နှင့်ခြေထောက်တို့တွင် ဒဏ်ရာများ ရရှိကာ သေဆုံးခဲ့ကြောင်း သိရသည်။
အဆိုပါ ရာအိမ်မှူးမှာ ရပ်ကွက်တွင် လင်မယားရန်ဖြစ်မှုကို ၃ ကြိမ်ထက်မနည်း သွားရောက်ဖျန်ဖြေချိန် ယောကျ်ားဖြစ်သူကို လက်ပါရာမှ ယင်းအမျိုးသားက အငြိုးထားခဲ့ကြောင်း၊ ယင်းနောက် ၂၂ ရက်နေ့က အငြိုးထားသူ အမျိုးသားမှာ အရက်ခေါ်တိုက်ပြီး အပြန်တွင် အသင့်ပါလာသော ဓားဖြင့် ထိုးခဲ့ခြင်းဖြစ်ကြောင်း မြို့ခံတစ်ဦးက ပြောသည်။
ဓားဖြင့်ခုတ်သူအမျိုးသားမှာ အသက် ၂၅ နှစ်အရွယ်ရှိပြီး သက်သေခံ ဓားကို တွေ့ရှိထားသော်လည်း ကျူးလွန်သူမှာ ထွက်ပြေးနေကြောင်း သိရသည်။ အဆိုပါ ဓားခုတ်အသတ်ခံရ၍ သေဆုံးမှုကို မြန်မာနိုင်ငံ လူမှုကယ်ဆယ်ရေးအဖွဲ့ (ပြည်) မှ အဖွဲ့ဝင် ၆ ဦးဖြင့် သွားရောက် ကူညီကာ ရုပ်အလောင်းကို ပြည်မြို့နယ် ပြည်သူ့ဆေးရုံရှိ ရင်ခွဲရုံသို့ ပို့ဆောင်ပေးခဲ့ကြောင်း သိရသည်။
