၂၃. ၁. ၂၀၂၄
Written by Nay Moe
မန္တလေးတိုင်းဒေသကြီး၊ မြင်းခြံမြို့နယ်၊ ဆီမီးခုံနယ်မြေရဲစခန်းက ဒုရဲအုပ်၊ ရဲမေဇနီးမောင်နှံ အပါအဝင် ရဲတပ်ဖွဲ့ဝင် ၅ ဦးနဲ့ အရပ်သား ၁ ဦး စုစုပေါင်း ၆ ဦးကို မြင်းခြံ PDF သုံးဖွဲ့ပေါင်းပြီး ပစ်ခတ်သတ်ဖြတ်လိုက်တယ်လို့ သိရပါတယ်။
ဖြစ်စဥ်က ဇန်နဝါရီ ၂၂ ရက်၊ နေ့လယ် ၁၂ နာရီအချိန်ခန့်မှာ မြင်းခြံမြို့နယ်၊ တပ်မတော်နေ့ စစ်ရေးပြအခမ်းအနားအတွက် လူတွေ့ဆေးစစ်ဆေးမှုခံယူပြီး၊ ဆီမီးခုံနယ်မြေရဲစခန်းကို မော်တော်ယာဥ်နဲ့ ပြန်လာတဲ့ ဒုရဲအုပ် ထင်အောင်ကျော် (၃၇) နှစ်၊ ရဲဒုတပ်ကြပ် စိုးဇေယျာမင်း (၃၂) နှစ်၊ ရဲတပ်သား အောင်သူရထွန်း (၂၅) နှစ်၊ ရဲတပ်သား မသော်သော်မျိုး (၂၆) နှစ်နဲ့ ခင်ပွန်း ဦးအောင်ဖြိုးသန့် (၂၃) နှစ်၊ အခြားရဲမေတစ်ဦးတို့ဟာ မြင်းခြံမြို့နယ် ရဲတပ်ဖွဲ့မှူးရုံးက ထွက်ခွာလာပြီး၊ တောပုကျေးရွာနဲ့ ဆင်းဂွတ်ကျေးရွာကြား၊ မြင်းခြံ-ဆီမီးခုံသွားကားလမ်းအရောက် အသင့်စောင့်နေကြတဲ့ PDF ၂၀ ခန့်က လမ်းဘေးကနေ တရစပ်ဝိုင်းဝန်း ပစ်ခတ်တိုက်ခိုက်ခဲ့တာကြောင့် ယာဥ်ပေါ်ပါ ၆ ဦးစလုံး သေဆုံးခဲ့တယ်လို့ ကနဦးသတင်းတွေအရ သိရပါတယ်။
ဒီဖြစ်စဥ်နဲ့ပတ်သက်ပြီး ကျုးလွန်တဲ့ မြင်းခြံ PDF သုံးဖွဲ့က MP-9၊ တလုပ်PDF(ရင်း၂) နဲ့ မိုင်းရာဇာအဖွဲ့တို့ဖြစ်ပြီး ရဲမေ ၂ ဦး၊ ရဲတပ်ဖွဲ့ဝင် ၄ ဦးကို သတ်ဖြတ်နိုင်ခဲ့တဲ့အပြင် G3 (၂)လက်နဲ့ အူဇီ(၁)လက်တို့ သိမ်းယူခဲ့တယ်လို့ မြင်းခြံလူထုလှုပ်ရှားမှုကော်မတီက ထုတ်ပြန်ထားပါတယ်။
