၁၂. ၁. ၂၀၂၄
Written by Ye Kyaw
တရားဝင် လုပ်ငန်းလိုင်စင် ရယူထားခြင်းမရှိဘဲ ထိုင်းနိုင်ငံ၊ တရုတ်နိုင်ငံနှင့် မလေးရှားနိုင်ငံများရှိ မြန်မာအလုပ်သမားလစာငွေများအား တရားမဝင်လွှဲပြောင်းထုတ်ပေးသူ ၉ ဦး၊ ကုန်ပစ္စည်း ဝယ်ယူခြင်းများအတွက် တရားမဝင်ငွေ လွှဲပြောင်းပေးချေပေးသူ ၃ ဦးနှင့် နိုင်ငံခြားငွေမှ မြန်မာကျပ်ငွေသို့ လဲလှယ်ပြီး ပြည်တွင်း၌ ငွေလွှဲပြောင်းထုတ်ပေးသူ ၈ ဦး စုစုပေါင်း တရားမဝင် ဟွန်ဒီ (Hundi)လုပ်ငန်းဆောင်ရွက်နေသူ ၂၀ ကို သက်ဆိုင် ရာဥပဒေများနှင့်အညီ တရားစွဲဆိုထားကြောင်း မြန်မာ နိုင်ငံတော်ဗဟိုဘဏ်က ယနေ့တွင် အသိပေးကြေညာထားသည်။
တရားမဝင် Hundi လုပ်ငန်းဆောင်ရွက်နေမှုများကို အထွေထွေအုပ်ချုပ်ရေးဦးစီးဌာန၊ အထူးစုံစမ်းစစ်ဆေးရေးဦးစီးဌာနနှင့် ငွေကြေးဆိုင်ရာ စုံစမ်းထောက်လှမ်း ရေးအဖွဲ့တို့နှင့် ပူးပေါင်းဆောင်ရွက်ပြီး စုံစမ်းစစ်ဆေးဖော်ထုတ်ခြင်းနှင့် သက်ဆိုင်ရာဥပဒေများနှင့်အညီ တရားစွဲဆို အရေးယူဆောင်ရွက်မှုများ ဆောင်ရွက်ခဲ့ရာ သံသယဖြစ်ဖွယ်ငွေလွှဲ/ငွေလဲလှယ်သည့် လုပ်ငန်းလုပ်ကိုင်သူ ၉၉ ဦးနှင့် ပတ်သက်၍ စိစစ်ဆောင်ရွက်ခဲ့ပြီး တရားမဝင် Hundi လုပ်ငန်းဆောင်ရွက်နေ လူပုဂ္ဂိုလ် ၂၀ ဦးကို မြန်မာနိုင်ငံရဲတပ်ဖွဲ့က အမှုဖွင့်အရေးယူခဲ့ခြင်းဖြစ်သည်။
ရွှေနှင့်ငွေကြေးဈေးကွက် စောင့်ကြည့်ထိန်းသိမ်း ကြပ်မတ်ရေးလုပ်ငန်းကော်မတီ၏ ဦးဆောင်မှုဖြင့် ပြည်ထဲရေးဝန်ကြီးဌာန၊ တရားဥပဒေ စိုးမိုးရေးအဖွဲ့အစည်းများနှင့် ပူးပေါင်းပြီး စီးပွားရေးလုပ်ငန်းရှင်များအနက် Hundi လုပ်ငန်းလုပ်ကိုင်ကြောင်း ကျော်စောသတင်း ပေါ်ပေါက်သူများအား စစ်ဆေးမေးမြန်းခြင်းနှင့် ယင်းကျော်စောသူများ၏ ဘဏ်စာရင်းများနှင့် ဘဏ်စနစ်ကိုအသုံးပြုပြီး ငွေလွှဲပြောင်းခြင်းများအား စိစစ်လျက်ရှိသည်။
ထိုသို့ စိစစ်မှုများအား မြန်မာနိုင်ငံတော်ဗဟိုဘဏ်၏ သတင်းနှင့်လုံခြုံရေးဌာနခွဲက တင်ပြလာသော သတင်းပေးပို့ချက်များအရ လူပုဂ္ဂိုလ်/ ကုမ္ပဏီ တစ်ခုသည် တရားမဝင် ငွေလွှဲလုပ်ငန်းဆောင်ရွက်နေကြောင်း စိစစ်တွေ့ရှိရပါက ဥပဒေပြဋ္ဌာန်းချက်များနှင့်အညီ အရေးယူပေးပါရန် ပြည်ထဲရေးဝန်ကြီးဌာနနှင့် တရားဥပဒေစိုးမိုးရေးအဖွဲ့ အစည်းများထံသို့ ဆက်လက်အကြောင်းကြားခြင်းများ ဆောင်ရွက်ခဲ့ခြင်းဖြစ်သည်။
