ထိုင်းနိုင်ငံ၊ ဘန်ကောက်တွင် လူကိုသေစေနိုင်သည့် ဇီကာဗိုင်းရပ် လျင်မြန်စွာပြန့်ပွားနေ

၂၈. ၁၂. ၂၀၂၃
translated by Htwe Ko Tun

ထိုင်းနိုင်ငံ၊ ဘန်ကောက်မြို့တွင် လူကို သေ​စေနိုင်သည့် ဇီကာဗိုင်းရပ်(Zika Virus) ကူးစက်ပြန့်ပွားလာမှုကြောင့် ပြည်သူများအနေဖြင့် ခြင်ကိုက်ခံရခြင်းမှ ဂရုစိုက်ကာကွယ်ကြပါရန် ရောဂါ ပိုးမွှားဗေဒ ပညာရှင်တစ်ဦးက ဒီဇင်ဘာ ၂၇ ရက်တွင် သတိပေးပြောကြားခဲ့သည်။

ချူလာလောင်ကွန်တက္ကသိုလ်၏ ဆေးဘက်ဆိုင်ရာဦးစီးဌာနမှ ဆေးရုံဆေးခန်းဆိုင်ရာရောဂါပိုးမွှားဗေဒ ပညာရှင်ဒေါက်တာ ယွန် ပူဗိုရာဝန်က ခြင်ကိုက်ခံရခြင်းမှ ဇီကာဗိုင်းရပ်ကူးစက်ပြန့်ပွားမှု မြင့်တက်လျက်ရှိ၍ ဘန်ကောက်မြို့အတွင်းနှင့် စေတီပုထိုးများတွင်ပါ ဗိုင်းရပ်ကူးစက်မှုကိုစောင့်ကြည့်ထောက်လှမ်းနေကြောင်းလည်း ၎င်း၏ လူမှုကွန်ရက် စာမျက်နှာ၌ ရေးသားခဲ့သည်။

၎င်းက မြို့တော်အတွင်း ဇီကာဗိုင်းရပ်ပျံ့နှံမှု ခံနေရသော လူနာအရေအတွက်ကို အတိအကျမပြောခဲ့သော် လည်း အဆိုပါ ဗိုင်းရပ် ကူးစက်ပျံ့နှံမှုက လူကိုသေစေနိုင်သည်အထိ အချို့လူနာများတွင် တွေ့ရကြောင်း ပြောခဲ့သည်။

အဆိုပါ ဗိုင်းရပ်ကူးစက်မှုက ကိုယ်ဝန်ဆောင်အမျိုးသမီးများတွင် ဦးဏှောက် ထိခိုက်ချို့တဲ့မှုရှိသည့် ကလေးမွေးဖွားခြင်း(သို့မဟုတ်)ပုံမှန်ထက်သေးငယ်သောဦးခေါင်းရှိသည့် ကလေးမွေးဖွားခြင်းတို့ကို ဖြစ်စေနိုင်ကြောင်း ဒေါက်တာယွန်က သတိပေးခဲ့သည်။

၎င်းက ဇီကာဗိုင်းရပ်မှာ အပူပိုင်းဒေသတွင် ပြင်းထန်သော အဖျားရောဂါဖြစ်စေသည့် Dengue ဗိုင်းရပ်ကဲ့သို့ပင် ခြင်ကိုက်ခံရခြင်းမှ ကူးစက်ပြန့်ပွားလာခြင်းဖြစ်ပြီး ဗိုင်းရပ်ပိုးသယ်ဆောင်ထားသော အေးဒီးစ်(Aedes) ခြင်အမျိုးအစားများ နေ့ဘက်တွင်အကိုက်ခံရခြင်းမှ လူသို့ အဓိကကူးစက်ခြင်းဟု ဆိုခဲ့သည့်။ ထို့ကြောင့်လည်း အရောင်ဖျော့သော လက်ရှည်အင်္ကျီများဝတ်ခြင်း၊အရေပြားတွင် ခြင်ကိုက်ခြင်းကိုကာကွယ်သည့်ဆေးများလိမ်းခြင်းတို့ကို ပြုလုပ်သင့်ကြကြောင်းလည်း ပြောခဲ့သည်။

ဇီကာဗိုင်းရပ်ကူးစက်ခံရပါက သုံးရက်မှ ခုနှစ်ရက်အတွင်း အဆစ်အမြစ်များနာခြင်း၊ မျက်စိနာခြင်း၊ ခေါင်းကိုက်ခြင်း၊ ကြွက်သားများနာကျင်ခြင်းနှင့် ပင်ပန်းနွမ်းလျခြင်းစသည့် ရောဂါလက္ခဏာများပြသကာ ဖျားခြင်း၊ အနီကွက်အနီစက်များ ပေါ်တတ်ကြောင်း တွေ့ရသည်။

ဇီကာဗိုင်းရပ်ကို မြန်မာနိုင်ငံအပါအဝင် အရှေ့တောင်အာရှနိုင်ငံများ၌ တွေ့ရှိရသည်။ မြန်မာနိုင်ငံတွင် ၂၀၁၆ ခုနှစ် အောက်တိုဘာလ၌ နိုင်ငံခြားသူတစ်ဦးတွင် ဇီကာဗိုင်းရပ်ကို စတင်တွေ့ရှိခဲ့သည်ဟု သိရသည်။

Ref——-Nation Thailand