၂၆. ၁၂. ၂၀၂၃
Written by Hey Mar
အသက် သုံးနှစ်အရွယ်ကလေးငယ် ပျောက်ဆုံးနေတာကြောင့် လိုက်လံရှာဖွေရာက ရပ်ကွက်ကြီး ရေနှုတ်မြောင်းအတွင်း ပြုတ်ကျမျောပါ သေဆုံးခဲ့တဲ့ ဖြစ်စဥ်တစ်ခု ဒီဇင်ဘာ ၂၅ ရက် ည ၇ နာရီ အချိန်ခန့်က မန္တလေးတိုင်းဒေသကြီး၊ အောင်မြေသာစံမြို့နယ်မှာ ဖြစ်ပွားခဲ့တယ်လို့ ဒေသခံ ပရဟိတ အသင်းထံကနေ သိရပါတယ်။
ဖြစ်စဥ်အရ မန္တလေးတိုင်းဒေသကြီး၊ အောင်မြေသာစံမြို့နယ်၊ သီရိမာလာအရှေ့ သင်္ဘောတန်းရပ်၊ အကွက် ၁၉၅ မှာနေထိုင်တဲ့ အသက် သုံးနှစ်အရွယ်ကလေးငယ်တစ်ဦး ပျောက်ဆုံးနေတယ်လို့ East Marlar Volunteer Fire Brigade အဖွဲ့ကို ရပ်ကွက်က အသိပေးအကြောင်း ကြားလာတာကြောင့် ကူညီရှာဖွေရေး လုပ်ငန်းစဥ်တွေ အချိန်နဲ့တစ်ပြေးညီ လုပ်ဆောင်ပေးခဲ့ကြောင်း၊ ကလေးပျောက်ချိန်နဲ့ အကြောင်းကြားတာကို လက်ခံသိရှိရချိန်က ၂ နာရီကျော်ကြာ ကွာဟသွားခဲ့ပြီး အိမ်အနီးမှာလည်း ရေနှုတ်မြောင်းရှိနေတဲ့အတွက် မြောင်းအတွင်း ဆင်းပြီး မြောင်းတစ်လျှေက် ရှာဖွေမတေတွေ ပြုလုပ်ဆောင်ရွက်ခဲ့ကြောင်း သိရပါတယ်။
ရှာဖွေကူညီရာမှာ အောင်မြေသာစံမြို့နယ် အရန်မီးသတ်တပ်ဖွဲ့၊ သီရိမာလာအနောက် အရန်မီးသတ်တပ်ဖွဲ့၊ အောင်မြေ အရန်မီးသတ်တပ်ဖွဲ့နဲ့ ညောင်ကွဲအရန်မီးသတ်တပ်ဖွဲ့တို့လည်း ပူပေါင်းပါဝင်ပေးခဲ့ကြပြီး ည ၁၀ နာရီဝန်းကျင်ခန့်မှာ ကလေးပျောက်တဲ့ နေရာရဲ့ အနောက် မြောက်ဘက် ရေမြောင်းပြွန်နဲ့ တံတားအကူးနေရာမှာ ကလေးငယ်ကို မျောပါသေဆုံးလျက်သား တွေရှိခဲ့ရတာကြောင့် သက်ဆိုင်ရာတာဝန်ရှိသူတွေရဲ့ လုပ်ငန်းစဥ်တွေကို ဆက်လက်ပူးပေါင်းကူညီပေးပြီး ကလေးရုပ်အလောင်းကို မန္တလေးပြည်သူ့ဆေးရုံကြီးထံ ပို့ဆောင်ပေးခဲ့တယ်လို့ သိရပါတယ်။
