၁၅. ၁၂. ၂၀၂၃
Written by KL
ရှမ်းပြည်နယ်တောင်ပိုင်း၊ ကလောမြို့နယ်၊ ဘော်ဆိုင်းမြို့ကန်ဦးရပ်ကွက်၊ အမှတ်(၁)ရေကန် (ဒေသအခေါ် -တွင်းစောက်ကန်) တွင် ဒီဇင်ဘာ ၁၄ ရက် ညနေ ၅ နာရီခန့်က အသက် ၁၈ နှစ်အရွယ် ရေနစ်သေဆုံးသော အမျိုးသားငယ်တစ်ဦး၏ အလောင်းကို တွေ့ရှိကြောင်း ဒေသခံများထံမှ သိရသည်။
ရေနစ်သေဆုံးသူမှာ ဘော်ဆိုင်းမြို့ရှိ စျေးပွဲတော်တွင် လာရောက်ဖွင့်လှစ်သော အပျော်စီး ပင်လယ်ဓားပြလှေမှ ဝန်ထမ်းတစ်ဦးဖြစ်ကြောင်း၊ ၁၃ ရက်နေ့ နေ့လယ်က တောင်ဘက်ကမ်းမှ မြောက်ဘက်ကမ်းသို့ ကူးခတ်စဥ် ရေလယ်တွင် ရေနစ်ကာ ပျောက်ဆုံးခဲ့ခြင်းဖြစ်ကြောင်း သိရသည်။
ရေနစ်သူကို အနီးရှိသူများနှင့် ပင်းတယပရဟိတအသင်းမှအသင်းဝင်များ ရှာဖွေခဲ့ရာ ဒီဇင်ဘာလ ၁၄ ရက်နေ့တွင် အလောင်းကို ပြန်လည်တွေ့ရှိခဲ့သည်။
ရေနစ်သေဆုံးသူ၏ ရုပ်အလောင်းကို ပင်းတယမြို့နယ်ပြည်သူဆေးရုံရှိ ရင်ခွဲရုံသို့ ပို့အပ်ထားကြောင်း ပင်းတယပရဟိတအသင်းထံမှ သိရသည်။
