MT News
Written by Nay Moe
၂၀၂၂ ခုနှစ် နိုဝင်ဘာလ ၁ ရက်က မင်္ဂလာတောင်ညွန့်မြို့နယ်၊ တောင်ညွန့်ကြီးရပ်ကွက်ရှိ ပုဇွန်တောင်ဘူတာဘူတာရုံးခန်းအတွင်းသို့ ပစ္စတို ၁ လက် ကိုင်ဆောင်ထားသည့် အမျိုးသား ၂ ဦး ဝင်ရောက်လာပြီး ဘူတာစာရေး ဦးသိန်းဝင်းထွန်းအား လက်နက်ဖြင့်ခြိမ်းခြောက်ကာ ရုံးခန်းအတွင်းရှိ ဆိုင်ခန်းခကောက်ခံငွေနှင့် ရထား လက်မှတ်ရောင်းရငွေ စုစုပေါင်း ငွေကျပ်သိန်း ၂၀ဝ ကျော်အား လုယက်ယူဆောင်သွားခဲ့သူများကို ဖမ်းမိရာမှ ထိုသူများမှာ KNLA တပ်မဟာ (၇) သင်တန်းဆင်းများဖြစ်နေပြီး ၎င်းတို့လုပ်ဆောင်ခဲ့သည့် အကြမ်းဖက်သတ်ဖြတ်မှုများနှင့် ဗုံးခွဲမှုများကိုပါ ဖော်ထုတ်နိုင်ခဲ့ကြောင်း SAC က ကြေညာထားသည်။
လုယက်မှုကျုးလွန်သူများကို နိုဝင်ဘာ၂၂ ရက် ညနေတွင် ဗဟန်းမြို့နယ်၊ ရေတာရှည်လမ်းဟောင်းရှိ လက်ဖက်ရည်ဆိုင်၌ စတင်ဖမ်းမိခဲ့ပြီး ထိုသူများမှာ သူရိန်ထွန်း(ခ)ဖိုးသား၊ ၎င်းနှင့် တရားမဝင်ပေါင်းသင်းနေသူ အိအိဇော်နှင့် ဝေလင်းအောင် တို့ ၃ ဦးအား ဖမ်းဆီးရမိခဲ့သည်။ သူရိန်ထွန်း၏ ထွက်ဆိုချက်အရ ယင်းနေ့ညပိုင်းတွင် ဒဂုံမြို့သစ် (ဆိပ်ကမ်း)မြို့နယ်၊ ဧရာချမ်းသာကွန်ဒို၊ တိုက်အမှတ်(၁၀/ဘီ)(၁၅)လွှာ၊ အခန်းအမှတ် (၂၁၇)၌ ဆက်စပ် တရားခံများဖြစ်သော ရဲရင့်ခန့် နှင့် ထွန်းလင်းအောင် တို့ ၂ ဦးအား ထပ်မံ ဖမ်းဆီးရမိခဲ့သည်။
ထွန်းလင်းအောင်၏ ထွက်ဆိုချက်အရ ဒဂုံမြို့သစ်(ဆိပ်ကမ်း)မြို့နယ်၊ ယုဇနဥယျာဉ်မြို့တော်၊ တိုက်အမှတ်(၃၁)အခန်းအမှတ် (၃၀၃)၌ Glock ပစ္စတို ၁ လက်၊ Sig Sauer ပစ္စတို ၁ လက်၊ အမျိုးအစား(စိစစ်ဆဲ)ပစ္စတို ၁ လက်၊ ၆ လုံးပြူး ၁ လက်၊ ကျည်အိမ်မျိုးစုံ ၆ ခု၊ ကျည်မျိုးစုံ ၁၅၂ တောင့် ၊ အသံတိတ် ပြောင်း ၁ ခု၊ လက်ပစ်ဗုံး မျိုးစုံ ၃၃ လုံး၊ ရှေ့ထွက်မိုင်း ၁ လုံး၊ TNT ယမ်းတောင့် ၁၆ တောင့်၊ ဒီတိုနေတာ ၁၀၀ ချောင်းနှင့် ဖောက်ခွဲရေး ဆက်စပ်ပစ္စည်းများအား သိမ်းဆည်း ရမိခဲ့သည်။
ဖမ်းဆီးရမိတရားခံများ၏ ထွက်ဆိုချက်အရ သူရိန်ထွန်းနှင့် ရဲရင့်ခန့်တို့ ၂ ဦးသည် ဖမ်းဆီးရန်ကျန်တရားခံ အားညီ၏ ချိတ်ဆက်ပေးမှုဖြင့် ၂၀၂၁ ခုနှစ် ဩဂုတ်လတွင် KNLA တပ်မဟာ(၇) ၌ အကြမ်းဖက်ဖောက်ခွဲဖျက်ဆီးရေး သင်တန်းအား ၁ လခန့် တက်ရောက်ခဲ့ကြောင်းနှင့် ဓားပြတိုက်လုယက်မှု ကျုးလွန်ရာတွင် အသုံးပြုမည့် လက်နက်/ခဲယမ်းများကို အားညီ က မြဝတီမြို့မှတစ်ဆင့် သူရိန်ထွန်းထံသို့ ပို့ဆောင်ပေးခဲ့ကြောင်း သိရသည်။
ဖမ်းဆီးရမိတရားခံများ၏ ထွက်ဆိုချက်အရ ဓားပြတိုက်လုယက်မှုဖြစ်စဉ် မဖြစ်ပွားမီ ဘူတာစာရေး သန်းဇော်ဦး (နိုဝင်ဘာလ ၁ ရက်တွင် ဖမ်းဆီးရမိ) သည် လက်ဖက်ရည်ဆိုင်သို့ ကြိုတင်သွားရောက်ရှောင်တိမ်းနေခဲ့ပြီး သူရိန်ထွန်းနှင့် ရဲရင့်ခန့် တို့အား ဖုန်းဆက်၍ ပုဇွန်တောင်ဘူတာ ရုံးခန်း၌ ဘူတာစာရေး ဦးသိန်းဝင်းထွန်း တစ်ဦးတည်းသာ ကျန်ရှိနေခဲ့ပြီး ဝင်ရောက်ဓားပြတိုက်လုယက်ရန် သတင်းပေးခဲ့သည်။ သို့ဖြစ်၍ သူရိန်ထွန်းနှင့် ရဲရင့်ခန့်တို့သည် ပစ္စတို ၁ လက် ကိုင်ဆောင်ကာ ပုဇွန်တောင်ဘူတာရုံးခန်းအတွင်းသို့ ဝင်ရောက်၍ ဓားပြတိုက်လုယက်မှု ကျူးလွန်ခဲ့ပြီး ထွန်းလင်းအောင်မှ အခြေအနေစောင့်ကြည့်ပေးခဲ့သည်။
ဖမ်းဆီးရမိတရားခံများ၏ ထွက်ဆိုချက်အရ ဖမ်းဆီးရန်ကျန် အားညီ၏ ခိုင်းစေမှုဖြင့် အပြစ်မဲ့ပြည်သူများအား အကြောင်းမဲ့လုပ်ကြံသတ်ဖြတ်မှု ၂ ကြိမ်နှင့် ဖောက်ခွဲမှု ၂ ကြိမ် ကျူးလွန်ခဲ့ကြောင်း သိရှိရသည်။
အဆိုပါ ကျုးလွန်မှုများမှာ ၂၀၂၂ ခုနှစ်၊ ဇူလိုင် ၃ ရက်တွင် တာမွေမြို့နယ်၊ ကျားကွက်သစ်ရပ်ကွက်ရှိ အုပ်ချုပ်ရေးမှူးရုံးအား သူရိန်ထွန်းနှင့် ထွန်းလင်းအောင်တို့မှ လက်လုပ်မိုင်း ၁ လုံးဖြင့် ပစ်ခတ်ဖောက်ခွဲခဲ့ပြီး အပြစ်မဲ့ပြည်သူ ၁ ဦး သေဆုံး၍ ၂ ဦး ဒဏ်ရာရရှိခဲ့သည့် ဖြစ်စဥ်၊ ဩဂုတ် ၈ ရက်တွင် တာမွေမြို့နယ်၊ ကျောက်မြောင်းကြီး(အရှေ့)ရပ်ကွက်ရှိ ရပ်ကွက်အုပ်ချုပ်ရေးမှူးရုံးရှေ့၌ ရာအိမ်မှူး ဦးကျော်မင်းဟန်အား သူရိန်ထွန်းမှ ပစ္စတိုဖြင့် ပစ်ခတ်လုပ်ကြံသတ်ဖြတ်ခဲ့ပြီး ထွန်းလင်းအောင် မှ အခြေအနေကြည့်ရှုပေးခဲ့သည့်ဖြစ်စဥ်၊ စက်တင်ဘာ ၁၀ ရက်တွင် တာမွေမြို့နယ်၊ ဗျိုင်းရေအိုးစင်ကွက်သစ် ရပ်ကွက်၊ ဗညားဒလလမ်းပေါ်၌ သူရိန်ထွန်းနှင့် ထွန်းလင်းအောင် တို့မှ လက်လုပ်ရီမုမိုင်း ၁ လုံး ဖောက်ခွဲခဲ့ပြီး ရဲရင့်ခန့်မှ အခြေအနေကြည့်ရှုပေးခဲ့သည့် ဖြစ်စဥ်နှင့် စက်တင်ဘာ ၁၃ ရက်တွင် မင်္ဂလာတောင်ညွန့်မြို့နယ်၊ ကျီတော်ရပ်ကွက်၊ အထက်ပုဇွန်တောင်လမ်း၊ ပုဇွန်တောင်မီးရထားဝင်းအတွင်းရှိ သက်သာဆိုင်၌ အပြစ်မဲ့ပြည်သူ ဦးအောင်အောင် အား သူရိန်ထွန်းမှ ပစ္စတိုဖြင့် ပစ်ခတ်လုပ်ကြံသတ်ဖြတ်ခဲ့ပြီး ထွန်းလင်းအောင်မှ အခြေအနေကြည့်ရှုပေးခဲ့သည့် ဖြစ်စဥ်များဖြစ်ကြောင်း သိရသည်။
အဆိုပါဖြစ်စဥ်တွင် ကျုးလွန်သူများကို ထိရောက်စွာအပြစ်ပေးအရေးယူနိုင်ရေးနှင့် ကျန်ရှိတရားခံများကို ဆက်လက်ဖမ်းဆီးနိုင်ရေး ဆောင်ရွက်နေကြောင်း သိရသည်။
