၉. ၁၂. ၂၀၂၃
Written By Thandar
ဗီယက်နမ်နိုင်ငံမှာ ကျင်းပနေတဲ့ Miss Earth 2023 ပြိုင်ပွဲကြီးရဲ့ Best Appearance Award Voting Photo မှာ Top 3 စာရင်းဝင်လို့ ဝမ်းသာပီတိ ဖြစ်နေပါတယ်လို့ မြန်မာနိုင်ငံ ကိုယ်စားပြုအလှမယ် ဆောင်းနှင်းစံက ပြော ပါတယ်။
“ဒီနေ့ အရမ်းကို ပျော်နေပါတယ်။ စိတ်လည်း အရမ်းကို လှုပ်ရှားရတဲ့နေ့ပါပဲ။ ဝမ်းသာစရာလေးပါပဲ။ Fan တွေရဲ့ ကျေးဇူးကြောင့် ညီမ Top 3 စာရင်း ပါသွားပါပြီ။ Voting တွေပေးကြတဲ့ Fan တွေ အများကြီးအားပေးလို့ ညီမ ဒီလိုနေရာလေးကို ရောက်လာတာပါ။ ပထမတော့ စာရင်းပါပါ့မလားပေါ့။ လုံးဝ မထင်ထားမိဘူး။ Voting ပိတ်တော့မယ်ဆိုတော့လေ။ အားပေးသူ တစ်ဦးတစ်ယောက်ဆီကို ကျေးဇူးတင်ပါတယ်။ Top 5 ထဲမှာမှ Top 3 ရခဲ့တာမို့ ဝမ်းသာပီတိဖြစ်ရပါတယ်။ ဒီထက်ပိုပြီး ကြိုးစားသွားပါမယ်လို့ ပြောချင်ပါတယ် ” လို့ အလှမယ် ဆောင်းနှင်းစံက MTNews Entertainment ကို ပြောပါတယ်။
Best Appearance Award ကို Miss Earth မွန်ဂိုလီယား ၊ Miss Earth ဗီယက်နမ်၊ Miss Earth ဖိလစ်ပိုင်၊ Miss Earth မြန်မာနဲ့ Miss Earth ကမ္ဘောဒီးယားဆိုပြီး Top 5 စာရင်းတွေကို ကြေညာထားတာလည်း ဖြစ်ပါတယ်။
နိုဝင်ဘာ ၂၈ ရက်ကနေ ဒီဇင်ဘာ ၂၂ ရက်နေ့အထိ ဗီယက်နမ်နိုင်ငံ ဟိုချီမင်းမြို့မှာ အိမ်ရှင်အနေနဲ့ လက်ခံ ကျင်းပနေတဲ့ ၂၃ ကြိမ်မြောက် Miss Earth 2023 ပြိုင်ပွဲကြီးမှာ နိုင်ငံပေါင်း ၁၁၄ နိုင်ငံက ကိုယ်စားပြုအလှမယ် တွေနဲ့အတူ အလှမယ် ဆောင်းနှင်းစံက အကြိတ်အနယ် ယှဥ်ပြိုင်နေတာလည်း ဖြစ်ပါတယ်။
“လာမယ့် ဒီဇင်ဘာ ၂၂ ရက်နေ့ ဖိုင်နယ်မှာ Top 20 ပါမယ့် Voting ပေးရမယ့်ပြိုင်ပွဲလည်း မကြာခင်လာမှာပါ။ ဒီပြိုင်ပွဲ Top 20 ဝင်ဖို့ကတော့ ပိုက်ဆံနဲ့ Vote ပေးရတယ်လို့ ညီမသိထားပါတယ်။ ငွေနဲ့ Vote ရတာမို့လည်း စိတ်ပူမိပါတယ်။ ညီမဘက်ကလည်း မြန်မာဆိုတာကို ချပြဖို ပြိုင်ပွဲအပေါ် ဆောင်း လက်ရှိ သေချာ အာရုံစိုက်ထားပါတယ်ရှင့်။ လက်ရှိ Best Appearance Award Voting Photo Top စာရင်းဝင်ထားတော့ Title ဆုတော့ပေးမယ်ပြောပါတယ် ” လို့ သူမက ဆက်ပြောပါတယ်။
ဆောင်းနှင်းစံဟာ ၂၀၂၃ ခုနှစ် အောက်တိုဘာ ၁၄ ရက်က ရန်ကုန်မြို့ Royal Mei Hua Function Hall မှာ ကျင်းပခဲ့တဲ့ Miss Earth Myanmar 2023 ပြိုင်ပွဲမှာ Winner ဆုအပြင် Title ဆုအနေနဲ့ Miss ZN Fashion 2023, Best in Swimsuit နဲ့ Miss Propoliz 2023 ဆုတွေကိုပါ ရရှိထားသူလည်း ဖြစ်ပါတယ်။
