၅.၁၂.၂၀၂၃
Written By Thandar
“နွယ်နီ” တေးသီချင်းနဲ့ ပရိသတ်အားပေးမှုအခိုင်အမာ ရရှိထားတဲ့ တေးရေး တေးဆို ညီမင်းခိုင်ရဲ့ ရင်တွင်းခံစားချက်တွေပါဝင်တဲ့ “ညီမင်းခိုင်နှင့် ဆယ့်ခြောက်နှစ်မိန်းမပျို” တစ်ကိုယ်တော် တေးသီချင်းခွေ မိတ်ဆက်ပွဲကို ဒီဇင်ဘာ ၅ ရက် မွန်းလွဲပိုင်းက ရန်ကုန်မြို့ ဗဟန်းမြို့နယ်ရှိ Infinity Bar မှာ ကျင်းပခဲ့ပါတယ်။
“ကျွန်တော့်ရဲ့ လွန်ခဲ့တဲ့ ၃ နှစ်လောက်ထဲက ကြိုးစားခဲ့တဲ့ ခွေလေး ခုမှ အကောင်အထည်ပေါ်လာတာပါ။ နောက်ဆုံးထွက်ခဲ့တဲ့ သီချင်းခွေနဲ့ဆိုရင် ၆ နှစ်ကျော်မှာ ပြန်ထွက်တဲ့အခွေပါ။ အလွမ်းသီချင်းတွေ မျိုးစုံတော့ ပါပါတယ်။ တစ်ပုဒ်ဆီမှာ ခံစားချက်တစ်မျိုးဆီတော့ ပါပါတယ်။ မန္တလေးသူ သီချင်းလေးက မန္တလေးက ကောင်မလေးတစ်ယောက်ကို ကြွေနေတုန်းက ရေးပြီး ဆိုဖြစ်တယ်။ အဝေးရောက် ရခိုင်သား သီချင်းလေးမှာ ရခိုင်လို တစ်ဝက် မြန်မာလို တစ်ဝက် အမှတ်တရလေး ဆိုထားပါတယ်” လို့ အဆိုတော် ညီမင်းခိုင်ကပြောပါတယ်။
တေးသီချင်းခွေမှာ တေးရေး ညီမင်းခိုင် ၊ ဝေကြီး တို့က ရေးသားထားတဲ့ မန္တလေးသူ ၊ ကြိုပြော ၊ နေတတ်လာတယ်၊ အလွမ်းနယ်မြေ၊ တွေ့ဆုံကြုံကွဲ၊ Alcohol၊ ရေမစိုတဲ့မိုး ၊ အတိတ်ဝင်္ကဘာ ၊ အဝေးရောက်ရခိုင်သား တေးသီချင်းတွေပါဝင်ထားတာလည်းဖြစ်ပါတယ်။
“ဒီခေတ်ကာလမှာ သီချင်းခွေရောင်းရတာ မရတာ မသိဘူး။ ခွေက ၃၀၀ ပဲထုတ်တာပါ။ ခုကတော့ ဒီသီချင်းခွေလက်ဆောင်က ၁၀၀ ကျော်ပေးမှာ ခွေရောင်းရတာ မရတာထက် အမှတ်တရလေးဖြစ်အောင်ပါ။ တစ်ချိန်က တေးစီးရီးမိတ်ဆက်ပွဲတွေကိုလည်း လွမ်းပါတယ်”လို့ သူက ဆက်ပြောပါတယ်။
“ညီမင်းခိုင်နှင့် ဆယ့်ခြောက်နှစ်မိန်းမပျို ” တေးသီချင်းခွေကို မနက်ဖြန် ဒီဇင်ဘာ ၆ ရက်နေ့က စတင်ပြီး Master တေးထုတ်လုပ်ရေး၊ Melo Music App နဲ့ အွန်လိုင်းပလက်ဖောင်းတွေကတစ်ဆင့် ထွက်ရှိသွားမှာဖြစ်တယ်လို့ သိရပါတယ်။
