၅.၁၂.၂၀၂၃
Written By Thandar
နာမည်ကြီးအနုပညာရှင်တွေနဲ့ ထိုင်းနိုင်ငံကဟာသမယ် သရုပ်ဆောင် Maeya Sun Sun တက်ရောက်လာတဲ့ “သရွီး” ရုပ်ရှင်ဇာတ်ကားကြီး Red Carpet Show ကို ဒီနေ့ ဒီဇင်ဘာ ၅ ရက် ညနေပိုင်းက ရန်ကုန်မြို့ သမ္မတအဆင့်မြင့် ရုပ်ရှင်ရုံမှာ ကျင်းပခဲ့ပါတယ်။
“ဒီဇာတ်ကားက လွန်ခဲ့တဲ့ ၄ နှစ်လောက်ထဲက ရိုက်ကူးထားတဲ့ ရုပ်ရှင်ကားလေးပါ။ သရဲ ဟာသကားလေးကို ကိုယ်က သရဲမလေးပေါ့။ ဒီထဲမှာ ကိုယ့်သရဲဆိုပေမယ့် ယောက်ျားလေးတွေဆိုရင် လိုက်ပြီး သရဲကလိုက်မခြောက်ဘူး။ မိန်းမ၊ ကလေးဆိုရင် သရဲက လိုက်ခြောက်တာပေါ့။ ဒီကြားထဲက ကိုယ်က ယောက်ျားလေး အဆင်လေးတွေဆိုရင် လူတွေကြားမှာလိုက်အိပ်သေးတာ။ ပျော်စရာလေးသရဲ ဟာသကားလေးပါ။ လာရောက်အားပေးကြပါဦး”လို့ သရုပ်ဆောင် ဂွမ်းပုံက ပြောပါတယ်။
ဒီဇာတ်ကားမှာ အကယ်ဒမီမြင့်မြတ် ၊ တက္ကသိုလ်ဂွမ်းပုံ၊ နန်းခင်ဇေယျာ၊ ထက်ထက်ထွန်း၊ ရွှေအိမ်စည်၊ Maeya Sun Sun နဲ့ အခြား အနုပညာရှင်များစွာ ပါဝင် သရုပ်ဆောင်ထားပါတယ်။
“ပရိသတ်တွေနဲ့လည်း လာတွေ့ချင်တယ်။ ဆွန်ဆွန်ရဲ့ ပထမဆုံး သရုပ်ဆောင်ထားတဲ့ ရုပ်ရှင်ကားလည်းဖြစ်တယ်။အခွင့်အရေးတွေ အများကြီးရရင်လည်း ထပ်ကြိုးစားချင်ပါသေးတယ်”လို့ ထိုင်းနိုင်ငံက ဟာသမယ် သရုပ်ဆောင် Maeya Sun Sun က ပြောပါတယ်။
“သရွီး” ရုပ်ရှင်ဇာတ်ကားကြီးကို လာမယ့် ဒီဇင်ဘာ ၇ ရက် အမျိုးသားနေ့မှာ မြန်မာတစ်ပြည်လုံး ရုံတင်ပြသမှာဖြစ်ပါတယ်။
