၅. ၁၂. ၂၀၂၃
Written by Ye Kyaw
စက်သုံးဆီအရောင်းဆိုင်အချို့ ယနေ့ညနေပိုင်းနှင့် ညပိုင်းတို့တွင် ဆီလုံးဝမရောင်းတော့ဘဲ မနက်ဖြန် မနက်မှသာ ရောင်းပေးတော့မည်ဟုဆိုကာ ဆိုင်များပိတ်ထားကြောင်း သိရသည်။
သီလဝါ Terminal များမှ ဆီထုတ်ရန် ခက်ခဲနေမှုများကြောင့် ယနေ့နံနက်ပိုင်းတွင် ရန်ကုန်မြို့ရှိ စက်သုံးဆီ အရောင်းဆိုင်အချို့ ဈေးနှုန်းမဖွင့်လှစ်ခြင်း၊ ယခင်ကဲ့သို့ တန်းစီ၍ပင် ဝယ်ယူမရသည့် အခြေအနေများ ဖြစ်ပေါ်ခဲ့ခြင်းဖြစ်သည်။
“မနက် ၈ နာရီလောက်မှ ရမယ်ပြောတယ်။ အချို့ကလည်း မနက်စောစောရမယ်ပြောတယ်။ ဘာမှန်းကို မသိပါဘူး။ ကျိန်းသေတာတော့ မနက်ဖြန်မှ ရတော့မယ်” ဟု တာမွေမြို့နယ်ရှိ ဆီအရောင်းဆိုင်တွင် တန်းစီနေသူ တစ်ဦးက ပြောသည်။
ဆီထုတ်ယူရန် အခက်အခဲများ၊ ဆီဝယ်ယူရန် အခက်အခဲများကြောင့် YBS ယာဥ်များလည်း အထွက်နည်းသဖြင့် ခရီးသွားပြည်သူ ၁ သန်းခွဲခန့်မှာလည်း ဘတ်စ်ကားမှတ်တိုင်များတွင် များပြားစွာစောင့်ဆိုင်းနေရမှုများလည်း ယနေ့ညဦးပိုင်းတွင် ဖြစ်ပေါ်နေသည်။
ဒီဇင်ဘာ ၅ ရက် ယနေ့တွင် ပြည်တွင်း စက်သုံးဆီဈေးနှုန်းမျာသည် ဓာတ်ဆီ ၉၂ တစ်လီတာ ၂၅၁၀ ကျပ်၊ ဓာတ်ဆီ ၉၅ တစ်လီတာ ၂၆၄၀ ကျပ်၊ ဒီဇယ်ရိုးရိုး တစ်လီတာ ၂၂၁၀ ကျပ်၊ ပရီမီယံဒီဇယ် တစ်လီတာ ၂၃၀၅ ကျပ် ဖြစ်ပေါ်လျက်ရှိသည်။
