၇. ၁၂. ၂၀၂၃
Written By Thandar
ရုပ်သံဇာတ်လမ်းတွဲတွေကတစ်ဆင့် ပရိသတ်အားပေးမှု အခိုင်အမာ ရရှိလာတဲ့ သရုပ်ဆောင် ဗညားဘုန်းပြည့်က ယနေ့ကျရောက်တဲ့ အသက် ၂၈ နှစ်ပြည့် မွေးနေ့အဖြစ် မွန်ပြည်နယ် မော်လမြိုင်နေအိမ်မှာ မုန့်ဟင်းခါး စတုဒိသာ ကျွေးမွေးအလှူပြုခဲ့ပါတယ်။
“ဒီနေ့ တန်ဆောင်မုန်းလပြည့်ကျော် ၁၀ ရက်နေ့ (အမျိုးသားနေ့) က ကျွန်တော့်မြန်မာနှစ်မွေးနေ့ပါ။ မော်လမြိုင်က အစ်မတွေက အိမ်ရှေ့မှာ စတုဒိသာ ကျွေးနေပါတယ်။ ကျွန်တော့်မွေးနေ့မှာ အိမ်မှာ မရှိပေမယ့် အလှူလေး ရိုက်ကူးရေးလုပ်ရင်းက လှူဖြစ်တာပါ။ လာရောက် အားပေးကြတဲ့ မော်လမြိုင်က ရပ်ဆွေရပ်မျိုးတွေ ကျေးဇူးပါ။ ကျွန်တော့်မွေးနေ့အတွက် မွေးနေ့ဆုတောင်းပေးကြသူတွေ၊ လက်ဆောင်ပို့ပေးသူတွေရော အားလုံးကို ကျေးဇူးတင်ပါတယ်။ ကျွန်တော့်အနေနဲ့ လက်ရှိအနုပညာနဲ့ ပတ်သက်ပြီးလည်း ပရိသတ်အတွက် အကောင်းဆုံး ကြိုးစားနေပါတယ်”လို့ သရုပ်ဆောင် ဗညားဘုန်းပြည့်က ပြောပါတယ်။
သူဟာ လက်ရှိ အိပ်မက်ထဲကအိပ်မက် ၊ အိမ်ထောင် ၊ ရင်ခုန်သံ FM ၊ လောင်စတဲ့ ဇာတ်လမ်းတွဲတွေကို ရိုက်ကူးထားသူလည်း ဖြစ်ပါတယ်။ ဗညားဘုန်းပြည့်က မာံဆာန်လောန် Cover Song မွန်သီချင်း တစ်ပုဒ် သီဆိုထားသလို မကြာခင် ရက်ပိုင်းကလည်း အဆွေးပုံစံ “ဖြည်းဖြည်းသတ်” သီချင်းသစ်လည်း ထွက်ရှိထားသူ ဖြစ်ပါတယ်။
