၃.၁၂.၂၀၂၃
Written by KL
ရန်ကုန်တိုင်းဒေသကြီး၊ သင်္ကန်းကျွန်းမြို့နယ်၊ ဆ/က ရပ်ကွက်၊ ကျိုက္ကဆံဘုရားလမ်းရှိ မဟာရန်ကုန်လက်ဖက် ရည်ဆိုင်နှင့် စားဖွယ်စုံဆိုင်တွင် ဒီဇင်ဘာ၂ရက် ည ၈ နာရီ ၅၁ မိနစ်ခန့်ကဖြစ်ပွားခဲ့သော မီးလောင်မှုမှာ မီးစက်ကို ဆီဖြည့်ရာမှ မီးဖိုသို့ ဓာတ်ဆီငွေ့ ထိတွေ့၍ မီးစတင်လောင်ကျွမ်းခြင်းဖြစ်ပြီး အမျိုးသားတစ်ဦးမီးလောင်ဒဏ်ရာရရှိခဲ့ကြောင်း သိရသည်။
အဆိုပါမီးလောင်မှုမှာ ဆိုင်မန်နေဂျာအမျိုးသားက လက်ဖက်ရည်ဖျော်ခန်းတွင် ထားရှိသော မီးစက်ကို ဆီဖြည့်ရာမှ အနီးရှိ မီးဖိုသို့ ဓာတ်ဆီငွေ့ ထိတွေ့ချိန် မီးစတင်လောင်ကျွမ်းခြင်းဖြစ်ပြီး လက်ဖက်ရည်ဖျော်ခန်း၏ သစ်သားတံခါးမှ တစ်ဆင့်အပေါ်ထပ်ခိုးပေါ်သို့ မီးကူးစက်လောင်ကျွမ်းခဲ့ကြောင်း စစ်ဆေးသူများ၏ အတည်ပြုချက်အရ သိရသည်။
မီးလောင်မှုမှာ ၁၅ မိနစ်ခန့်သာကြာမြင့်ခဲ့ပြီး မီးစက် ၁ လုံး၊ ထပ်ခိုးရှိ အလုပ်သမား အိပ်ဆောင်ကြမ်းခင်းနှင့်အိပ်ရာခင်းများ မီးလောင်ကျွမ်းခဲ့ကာ မန်နေဂျာ ဦးရွှေသီး(၄၅နှစ်)၏ ဘယ်ဘက်ပါး၊ လက်နှင့်ခြေထောက်တို့တွင် မီးလောင်ဒဏ်ရာများ ရရှိသဖြင့် ရန်ကုန်ပြည်သူ့ဆေးရုံကြီးတွင် ဆေးကုသမှုခံယူနေရကြောင်း သိရှိရသည်။
မီးလောင်မှုကြောင့် မန်နေဂျာ ဦးရွှေသီးကို သင်္ဃန်းကျွန်းမြို့မရဲစခန်းက ပုဒ်မ ၂၈၅၊ ၃၃၇ဖြင့် အမှုဖွင့်ထားကြောင်း သိရှိရသည်။
