ရုရှားစီးပွားရေးမစ်ရှင် မြန်မာနိုင်ငံတွင် ကျင်းပမည်

MT News
၂၈. ၁၁. ၂၀၂၃

လာမည့် ဒီဇင်ဘာ ၅ ရက်နှင့် ၆ ရက်နေ့များတွင် ရုရှားနိုင်ငံ၏ ထုတ်လုပ်ရေးလုပ်ငန်း ၈ ခု ဦးဆောင် ပါဝင်မည့် နယ်ပယ်ပေါင်းစုံပါဝင်သော စီးပွားရေးမစ်ရှင်တစ်ခုကို ရန်ကုန်မြို့ Panpacific Hotel တွင် ကျင်းပမည်ဖြစ်ကြောင်း ရုရှားနိုင်ငံပို့ကုန်လုပ်ငန်းစင်တာက ယနေ့ထုတ်ပြန်လိုက်သည်။

အဆိုပါ စီးပွားရေးမစ်ရှင်ကို မြန်မာနိုင်ငံရှိ ရုရှားကုန်သွယ်ရေးကိုယ်စားလှယ်အဖွဲ့၏ အကူအညီဖြင့် ရုရှားနိုင်ငံပို့ကုန်စင်တာ (VEB.RF အုပ်စု) က စီစဉ်ဆောင်ရွက်ခြင်းဖြစ်သည်။ မစ်ရှင်တွင် ပါဝင်လာမည့် ကုမ္ပဏီများသည် သတင်းအချက်အလက်နည်းပညာဆိုင်ရာနယ်ပယ်၊ စားသောက်ကုန်ထုတ်လုပ်မှုဆိုင်ရာနယ်ပယ်နှင့် မော်တော်ယာဉ်တည်ဆောက်ရေးနယ်ပယ်ဆိုင်ရာများ၏ ထုတ်ကုန်များနှင့် လုပ်ဆောင်ချက်များကို တင်ပြသွားမည်ဖြစ်သည်။

စီးပွားရေးမစ်ရှင်ကျင်းပရာတွင် ရုရှားနိုင်ငံမှ ကုမ္ပဏီများသည် မြန်မာနိုင်ငံမှ အလားအလာရှိသော မိတ်ဖက်ကုမ္ပဏီများနှင့် မျှော်မှန်းဆွေးနွေးပွဲပေါင်း ၁၀၀ ခန့် ဆွေးနွေးသွားရန် စီစဉ်ထားသည်။

အလားတူပင် ဒီဇင်ဘာလ ၅ ရက်နေ့တွင် “ရုရှား-မြန်မာ နှစ်နိုင်ငံ ချစ်ကြည်ရင်းနှီးမှု တိုးတက်စေရေး အဓိကအချက်အလက်များ” ခေါင်းစဉ်ဖြင့် သက်ဆိုင်ရာကိုယ်စားလှယ်များနှင့် စီးပွားရေးအဖွဲ့အစည်းများမှ ကိုယ်စားလှယ်များက နယ်ပယ်အသီးသီးတွင် နှစ်နိုင်ငံအကြား အလားအလာကောင်းများ တည်ဆောက်ရေးနှင့် ပိုမိုလေးနက်စေရေး အတူတကွ ပူးတွဲလုပ်ဆောင်နိုင်မှုများကို အလုပ်သဘောဆွေးနွေးပွဲ ကျင်းပသွားမည်ဖြစ်သည်။

၂၀၂၃ ခုနှစ်သည် ရုရှား-မြန်မာနှစ်နိုင်ငံ သံတမန်ဆက်ဆံရေး ထူထောင်သည့် ၇၅ နှစ်ပြည့် အထိမ်းအမှတ်လည်းဖြစ်သည်။ ယခု စီးပွားရေးမစ်ရှင်သည် နှစ်နိုင်ငံအကြား ကုန်သွယ်ရေး-စီးပွား ရေး ဆိုင်ရာ ပူးပေါင်းဆောင်ရွက်မှုကို ပိုမိုခိုင်မာစေသည့် ခြေလှမ်းတရပ်လည်း ဖြစ်လာမည်ဖြစ်သည်။

ရုရှားနိုင်ငံပို့ကုန်စင်တာ (REC အုပ်စု ၊ VEB.RF အုပ်စုဝင်) သည် အဓိကမဟုတ်သော ပို့ကုန်များ၊ စွမ်းအင်မဟုတ်သော ပို့ကုန်များ တင်ပို့ရာတွင် အထောက်အကူပြုစေရန် ဖွဲ့စည်းထားသော အစိုးရအဖွဲ့အစည်းတစ်ခုဖြစ်ပြီး နယ်ပယ်အသီးသီးမှ ကုမ္ပဏီများအား ငွေကြေးဆိုင်ရာအထောက်အပံ့များ၊ ငွေကြေးနှင့်မသက်ဆိုင်သော အထောက်အပံ့များကို ပြည်ပဈေးကွက်များသို့ ထုတ်ကုန်များ ထုတ်နိုင်သည်အထိ အဆင့်တိုင်း၌ ကူညီထောက်ပံ့ပေးလျက်ရှိသည်။ ထို့အတူ နိုင်ငံတော်ပရောဂျက်တစ်ခုဖြစ်သည့် “အပြည်ပြည်ဆိုင်ရာ ပူးပေါင်းဆောင်ရွက်ရေးနှင့် ပို့ကုန်တင်ပို့ရေး” ပရောဂျက်မူဘောင်အတွင်းမှ လုပ်ဆောင်လျက်ရှိသည်။ REC အုပ်စုတွင် ရုရှားနိုင်ငံ ပို့ကုန်ချေးငွေနှင့် ရင်းနှီးမြှုပ်နှံမှုဆိုင်ရာ အာမခံဌာန (EXIAR)၊ ROSEKSIMBANK နှင့် ပို့ကုန်ရေးရာသင်တန်းကျောင်းတို့လည်း ပါဝင်သည်။

စီးပွားရေးမစ်ရှင်တက်ရောက်လိုသူများ စာရင်းပေးသွင်းနိုင်မည့်လင့်ခ်ကို MT News သတင်းဌာန၏ တယ်လီဂရန်တွင် ရယူနိုင်မည်ဖြစ်သည်။

https://docs.google.com/forms/d/e/1FAIpQLSeWPG-PvhDv1Cg1AcO71FCKdY3-L0VU1QwP_RETwLsjZgOK8g/viewform