၁၇. ၁၁. ၂၀၂၃
Written by KL
မန္တလေးတိုင်းဒေသကြီးအတွင်းရှိ တောင်လှေကားမြို့တော်ဟု ခေါ်တွင်သော ပြင်ဦးလွင်မြို့၌ ရိုးရာတန်ဆောင်တိုင် မီးပုံးပျံပွဲတော်ကို နိုဝင်ဘာ ၂၄ ရက်မှ နိုဝင်ဘာ ၂၈ ရက်အထိ ၅ ရက်ကြာ ကျင်းပပြုလုပ်မည်ဖြစ်ကြောင်း တန်ဆောင်တိုင်ပွဲတော်ကျင်းပရေး ဦးစီးကော်မတီထံမှ သိရသည်။
ပြင်ဦးလွင်တန်ဆောင်တိုင် မီးပုံးပျံပွဲတော်ကို ပြင်ဦးလွင်မြို့ မဟာအံ့ထူးကံသာ ဆုတောင်းပြည့်ဘုရားဝင်းအတွင်း၌ ကျင်းပပြုလုပ်မည်ဖြစ်ပြီး၊ ဖျော်ဖြေရေးပွဲနှင့် ပျော်ပွဲရွှင်ပွဲများ ပါဝင်ပြုလုပ်မည်ဖြစ်ကြောင်း သိရှိရသည်။
မီးပုံးပျံပွဲတော်တွင် စိန်နားပန်မီးပုံး ၁၂ လုံး၊ နေ့ရုပ်အလှ မီးပုံး ၃၅ လုံး၊ ညမီးကျည် ၁၇ လုံးတို့ကို လွှတ်တင်မည်ဖြစ်ကြောင်း၊ ပွဲတော်တွင် လူသုံးကုန်ပြခန်းများ၊စားသောက်ကုန်ပြခန်းများလည်း ပါဝင်မည်ဖြစ်ကြောင်း သိရှိရသည်။
တန်ဆောင်တိုင် မီးပုံးပျံပွဲတော်ကိုကျင်းပလာသည်မှာ ၁၇ ကြိမ်မြောက် ရှိပြီဖြစ်ပြီး ပြင်ဦးလွင်မြို့တွင် အစည်ကားဆုံးသော ပွဲတော်တစ်ခုလည်း ဖြစ်သည်။
